1,1 milioi euro Europatik Pasaiara
Europako FEDER funtsetik jasoko du diru hori udalak. Eskualdeak laguntza eskaera bateratua egin du, eta Gipuzkoakoen artetik onartu den bakarra izan da.
Trintxerpeko Andonaegi eremua biziberritzen jarraitzeko erabiliko da Europatik jasotakoaren zati bat. Pasaiako Udalak 1,1 milioi euro inguru jasoko ditu Europako FEDER funtsetik, Espainiako Gobernuaren bitartez kudeatzen dena. Erakunde publikoei diru laguntzak ematen dizkien funtsa da FEDER, eta laguntza horiek lortzeko lurralde, gizarte, edo ekonomia arloko arrakalak gutxitzeko proposamenak aurkeztu behar dituzte erakunde interesdunek. Pasaia, Oarsoaldea mailan egin den eskaeraren zati izan da, Oarsoaldea Garapen Agentziak bideratutakoa. Oarsoaldeko bateratua Europak onartu duen Gipuzkoako proposamen bakarra izan da: osotara ia 5,6 milioi euro iritsiko dira (13,7 milioiko eskaera egin zen; eskatutakoaren %40 jasoko da), beraz, FEDER bidez eskualdera. Horietatik 1,1 inguru Pasaiara. Teo Alberro alkateak pozarren baloratu du laguntza: “Pasaiarentzat lorpen hori bultzada garrantzitsua da herria berroneratzeko eta kohesio soziala lortzeko prozesuan, bereziki Andonaegi eta Azkuene auzoetan, premia handiak baitituzte”.
Izan ere, Pasaiaren eskaeren zerrendan pisu berezikoak ziren Trintxerpeko bi eremu horien biziberritzerako finantzazio proposamenak, beraz, jasotakoarekin horiei ekiteko bultzada izango du udalak. Hala, Andonaegin hango espazio publikoa berroneratzeko bigarren fasea eta hango hiri espazioa bizigarriago egiteko jardunak finantzatu ahal izango dira FEDERetik etorritakoarekin. Azkuene aldeko parkearen berrantolatze prozesuari ere eragingo dio Europatik etorritako ufada ekonomikoak. Tokiko ekonomia sustatzeko ere erabiliko da jasotakoaren zati bat, baita bazterkeria arriskuan dauden pertsonak gizarteratzeko eguneko zentrorako ere. Horien guztien aurrekontu osoa 2,7 milioi eurokoa da.
Udalaren arabera, diru ekarpen hori eskualdeko lau udalek Oarsoaldea Garapen Agentziaren bitartez garatutako elkarlanaren aintzatespen garrantzitsua da, “eta udalerrien arteko lankidetza eredua finkatzen du lurraldearen hiri, gizarte eta ekonomia garapenaren erronkei modu bateratuan heltzeko bide eraginkor bezala”. Alberrok adierazi du eskualdean era bateratuan lan egiteko gaitasuna badagoela, eta horren seinale dela lau herriek batera landu eta eskatu izana FEDERerako sarbidea, “pertsonak eta jasangarritasuna ekintza publikoaren erdigunean jartzen dituzten eragin handiko proiektuak diseinatuz”.
