AZTIk ateak irekiko ditu larunbatean
Aldaketaren Marea egitasmoaren baitan, Pasaiako zentro teknologikoak egiten duen lana ezagutaraziko du hilaren 18an, 11:30etik 14:00etara. Sarrera librea da.
Aldaketaren Marea egitasmoaren baitan, AZTI zentro teknologikoak Pasaiako portuko egoitzako ateak irekiko ditu larunbatean (hilaren 18an). 11:30etik 14:00etara bitartean izango da jardunaldi irekia, eta herritarrek bertatik bertara ezagutu ahal izango dute ikerketa zentroak egiten duen lana. Sarrera librea da, edukiera bete arte. Pasaian, arrantza jasangarriko, ozeanografiako, itsas ekosistemen kudeaketako eta klima aldaketaren ikerketako proiektu buru da AZTI, eta itsasoak ezagutzen eta babesten laguntzen du.
AZTIra bertaratzen direnek, “punta-puntako” teknologiak ezagutzeko aukera izango dutela adierazi du zentro teknologikoak: itsas ibilgailu autonomoak, ikerketa ontziak, dragak, CTD zundak eta ozeanoak zein itsas zaborrak aztertzeko erabiltzen diren beste ekipo zientifiko batzuk. Horrez gain, AZTIko laborategiak bisitatu eta ikertzaileekin hitz egiteko aukera izango da.
AZTIko kideek larunbatean egingo den jardueretako bat nabarmendu dute: Ulysses proiektuan parte hartzea. Proiektu horretan, AZTIk bazkide zientifiko gisa jarduten du. Parte hartzaileek GPS sistemadun egurrezko txalupa txikiak apainduko dituzte. Txalupa horiek itsasora abiatuko dira, mezu pertsonalak eramanez eta itsas zaborren ibilbidea simulatuz. Modu sortzaile eta hezitzailean, ozeanoen kutsadura murriztearen garrantziaz sentsibilizatuko dituzte AZTIra bertaratzen direnak.
Aldaketaren Marea iniziatibarekin, AZTIk zientziarekin, ingurumenarekin eta gizartearekin duen konpromisoa berresten duela baietsi du, bere lana herritarrei hurbilduz eta erakutsiz nola sortzen den Pasaiatik mundu mailako inpaktua duen ezagutza. “Herritarrek gertutik ezagutzea nahi dugu, Pasaiako zentroan egiten den zientzia, itsasoak gure etorkizunean duen balioa eta planeta zaintzeko ekintza txiki bakoitzaren garrantzia”, esan dute zentro teknologikoko kideek.
