Donibaneko eta Trintxerpeko frontoiak hobetu ditu udalak
Pasaiako Udalak konponketak, margotze lanak edota garbiketa lanak egin ditu bi kirol guneetan azken hilabeteetan.
Pasaiako Udaleko Kirol eta Zerbitzu sailek Donibaneko eta Trintxerpeko frontoietan hobekuntza lanak egin dituzte. Azken hilabeteetan konponketak, margotze lanak eta garbiketa lanak egin dituzte gehienbat, baina aurretik ere beste lan batzuk egin zituzten eremu horietan.
Trintxerpen, esaterako, areto futbolean, eskubaloian edota boleibolean aritzeko zelaiak margotu dituzte. Horrez gain, ateak eta boleibolean jokatzeko posteak erosi ditu udalak, eta horiek lurrean ainguratzeko egiturak instalatu ditu. Pilotalekuko sarreran, gainera, ate lerragarri bat jarri dute, muntaiak eta ebakuazioak errazteko. Horri esker, furgonetek eta garbitze eta mantentze lanetako zerbitzuek barrura sartzeko aukera izango dute orain. Trintxerpeko kirol gunean itoginak ere konpondu dituzte, gainaldeko policarbonatoko plakak aldatuta. Azkenik, frontoi osoko paretak konpondu eta berriro margotu dituzte.
Donibaneko pilotalekuari dagokionez, teilatuan zeuden itoginak konpondu eta margotze lanak egin dituzte. Horrez gain, bi frontoietako estalkietan bizi lerroak jarri dituzte etorkizunean egin beharko diren lanetan langileen segurtasuna gehiago bermatzeko. Bi pilotalekuetako jarduerak gauzatzeko, 71.717 euroko inbertsioa egin du udalak, BEZ barne.
