Herritarren sarea egituratzeko lehen pausoa eman du Oiartzun Burujabek
Berrogeita hamar bat lagun elkartu dira gaur goizean Oiartzungo kontzejupean. Egitasmoaren aurkezpena egin, orain arte egindakoak azaldu eta dinamika bat burutu dute, herritik zer nolako ekarpena egin dezaketen zehazteko.
Duela urtebete sortu zuten Oiartzun Burujabe egitasmoa, eta azken hilabeteetan energia, zaintza, euskara, kultura eta elikadura ardatz dituzten mahai sektorialak sortzen eta sendotzen aritu ondoren, pausu berri bat emateko unea zela erabaki dute egitasmoko kideek: egitasmoaren erpin garrantzitsua den herritarren sarea egituratzeko batzarra egin dute.
Asier Legorburu egitasmoko kideak azaldu duenez, batzar horretako helburu nagusia, komunitatea saretzea ez ezik, eta herritik, komunitatetik, Oiartzun Burujaberi zer nolako ekarpena egin daitekeen ikustea izan da.
Oiartzungo Udaleko areto nagusian egin dute batzarra, goizeko 10:45ean, eta berrogeita hamar bat lagun elkartu dira bertan. “Guretzako kopuru polita izan da, nahiz eta herrian askoz ere masa kritiko handiagoa izan. Badakigu halako deialdietara etortzea kostatzen dela zenbaitetan”. Ondoren, kontzejupera jaitsi dira, bertan azken dinamika egiteko.
Lehenik Oiartzun Burujaberen aurkezpena egin, eta orain artean egin duten lana azaldu dute. Ondoren, mahai sektorialetan parte hartu duten zenbait lagunek bertan landu dituzten proiektuak aurkeztu dituzte, eta segidan, dinamika bat egin dute proiektu horiei eta berriei herritik zer nolako ekarpena egin diezaioketen zehazteko. Eta azkenik, herritarren konpromiso maila ezagutu nahi izan dute.
Gaur herritarren sarea egituratzeko lehen urratsa izan dela esan du Legorburuk, eta egiteko horretan eta urrats berriak ematen jarraituko dutela.
Bileraren ondoren “pozik” geratu da Legorburu, nahiz-eta jakitun den ez direla komunitatearen sarearentzat garairik onenak: “Pixka bat ahulduta dago herrigintza Euskal Herrian, nahiz-eta proiektu pila eta oso potenteak izan baditugun herrian. Herriaren aktibazioa eta ahalduntze politikoa ez dago bere momenturik gorenean, eta beraz erronka da. Baina gogotsu gaude eta saiatuko gara horretan”.
