"Nazkatuta eta haserre" irten dira kalera Errenteriako feministak
Herenegun gauean 47 urteko gizon batek 53 urteko emakumea hil zuela salatzeko egin dute elkarretaratzea Errenteria-Oreretako feministek. Erakundeei zein indarkeria matxistaren konplize diren orori dagokien ardura hartzeko exijitu diete.
Clara Ranjel plazan egin dute elkarretaratzea. Herenegun gauean Zarautzen gertatu zen hilketa matxista salatzeko [Ertzaintzak hilketa matxista izan dela baieztatu berri du] elkartu dira errenteriarrak gaur, eguerdiko 12:30ean. Clara Ranjel plazan egin dute elkarretaratzea, eta bertan, Emakumeen Mundu Martxak egindako adierazpena irakurri dute.
2025 hasi zenetik seigarrenez aktibatu behar izan dute Emakumeen Mundu Martxako erailketen protokoloa. Oraingoan, urriaren 16an Zarautzen 47 urteko gizon batek 53 urteko emakumea hil zuela salatzeko aktibatu behar izan dute.
Ezer baino lehen, mugimendu feministatik senide, lagun eta gertukoei “samina eta babesa” adierazi nahi izan diete. Eta ondoren, argi utzi dute “nazkatuta eta haserre” daudela, indarkeria matxista “etengabe eta hamaika formatan” ikusten dutelako, eta “zoritxarrez”, erailketak salatzen jarraitu behar dutelako. Baina esan dute prest daudela halako gertakari bakoitzaren aurrean erakundeei “dagokien ardura” har dezaten exijitzeko eta indarkeria matxistaren konplize den orori ardurak exijitzeko, “gizonei bereziki”, zehaztu dute.
Izan ere, hilketa eta eraso matxistak ez dira “gertakari isolatuak”, “sistema oso batek ahalbidetzen duen indarkeria da. Sistema kapitalista zisheteropatriarkal kolonialista eta arrazistak ahalbidetutakoa”. Eta errealitate “gordin” horri aurre egiteko erakundeei “urgentziazko mekanismoak” har ditzaten exijitu diete, eta aldi berean, haien “pasibotasuna” salatu dute.
Azkenik, egungo gizartean dauden jarrera konplizeak salatu eta autodefentsa feministarako deia egin dute.
Errenteriako Udalaren adierazpen instituzionala
Bestalde, Errenteriako Udaleko talde politiko guztiek ere mugimendu feministak deitutako kontzentrazioarekin bat egin eta guztien artean adostutako adierazpen instituzionala plazaratu dute.
Bertan adierazi dutenez, Errenteriako Udalak “erabat gaitzesten du” Zarautzen gertatutako erailketa matxista, eta eraso matxista guztien aurrean “zero tolerantzia” adierazi dute. “Horrelako gertaerak ez ditugu gure jendartean onartzen, eta erakunde gisara lanean jarraituko dugu emakumeok indarkeria matxistarik gabe bizi gaitezen”, esan dute.
Aldi berean, herritarrak, eta bereziki gizonezkoak, beren jokabide eta jarrerak “arretaz erreparatzera” gonbidatu dituzte, eta edonolako erasoren aurrean jarrera aktiboz jokatu dezatela eskatu diete. Azkenik, familiari elkartasunik beroena adierazi diote.
