Zarautzen gertatutako hilketa matxista salatzeko, oiartzuarrak kalera
Oiartzungo Feministen Asanbladak deituta elkarretaratzea egin dute. 20 minutuko elkarretaratze isila egin ondoren, Emakumeen Mundu Martxak egindako adierazpena irakurri dute.
Gaur eguerdiko 13:00etan elkarretaratzea egin dute Oiartzungo herritarrek Oiartzungo Feministen Asanbladak deituta, Done Eztebe plazan. Izan ere, herenegun gauean Zarautzen 47 urteko gizon batek 53 urteko emakumea hil zuen. Gertatutakoa salatzeko eta erakundeei zein indarkeria matxistaren konplize diren guztiei erantzukizunak exijitzeko irten dira plazara.
Eraila izan den emakumearen senide, lagun eta gertukoei samina adierazi eta “zoritxarrez”, oraindik ere erailketak salatzen jarraitu behar dutela adierazi dute. “Indarkeria matxista etengabe hamaika formatan ikusten dugu. Baina gu prest gaude halako gertakari bakoitzaren aurrean erakundeei dagokien ardura har dezaten exijitzeko eta indarkeria matxistaren konplize den orori ardurak exijitzeko, gizonei bereziki”.
Izan ere, argi dute hilketa eta eraso matxistak ez direla gertakari isolatuak, ez dira ezbehar puntualak. “Sistema oso batek ahalbidetzen duen indarkeria da. Sistema kapitalista zisheteropatriarkal kolonialista eta arrazistak ahalbidetutakoa”. Eta errealitate “gordin” horri aurre egiteko erakundeei “urgentziazko mekanismoak” har ditzaten exijitu diete, eta aldi berean, haien “pasibotasuna” salatu dute.
