Elizalde Eskolak Haur Hezkuntzako eremu bat naturalizatu eta berritu du
Jolaserako eta ikaskuntzarako "espazio natural, seguru eta hezitzaile" berri bat eskainiko diete haurrei. Larunbatean amaitu zuten proiektua.
Elizalde Eskolak Haur Hezkuntzako eraikin txikiko kanpo eremua naturalizatu eta biziberritzeko proiektua gauzatu du, eta jolaserako eta ikaskuntzarako espazio “natural, seguru eta hezitzaile” berri bat eskainiko die bi eta hiru urte arteko haurrei “kalitatezko hezkuntza publikoa eta jasangarritasun irizpideak sustatuz”.
Azaldu dutenez, “hezkuntza publikoaren eta komunitatearen aldeko apustu irmoa eginez” lortu dute eremu hori eraldatzea, kanpo eremua ez baitzegoen “bertako haurren adinaren beharretara egokituta”; zehazki, hormigoi gogorrak eta jolaserako aukera mugatuek osatzen zuten nagusiki, eta diote hori segurtasunaren ikuspuntutik ez zela “egokia”.
Proiektu horrekin Elizalde Eskolak “hezkuntza komunitatearen erantzun partekatu bat” eskaini du. Irakaskuntza espazio berri hori naturan oinarrituta egin dute, eta kontatu dute horrek zuzenean laguntzen duela eskola publikoaren izaera indartzen doako kalitatezko hezkuntza publikoaren esparruan.
Aipatutako eraldaketa prozesu hori garapen jasangarriaren irizpideetan oinarritua egin dute, eta hormigoizko eremua gutxitu eta material natural zein birziklatuekin lan egitea lehenetsi dute. Era berean, jakinarazi dute naturaren presentzia haurren heziketako eszenatoki bihurtu dutela, eta, gainera, baratza bat eta landare aromatikoen lorategi bat txertatuko dituztela sarrera nagusiko kanpo eremuan. Hots, zomorroen hotelak, txorien habiak eta jantokiak jarri dituzte “biodibertsitatea sustatuz eta balio pedagogiko handia duten elementuak eskainiz”. Azkenik, azpimarratu dute jolastokiaren lurzorua ere naturala izango dela.
Proiektu horri pasa den larunbatean eman zioten amaiera, hezkuntza komunitatea osatzen duten familiak eta irakasleak elkartu eta lorezaintza lanak, egur lanak, muntaketa eta deseraikitze lanak egin baitzituzten lortutako espazioa erabat amaitzeko.
Bestalde, Elizalde Eskolakoek diotenez, proiektu horrek genero berdintasunari “ekarpen zuzena” egiten dio. Honela diote: “Alde batetik, jolaserako aukerak dibertsifikatzeak neska mutikoen jolas moten estereotipoak hausten laguntzen du. Bestetik, auzolanaren bitartez, gure ikasleei balioak erakusten zaizkie, hala nola lankidetza, errespetua eta gizon zein emakumeek eraikuntza zein zaintza lanetan duten erantzukizun partekatua”.
Proiektu hori gauzatzeko Elizalde Guraso Elkartea, Oiartzungo Udala eta Gipuzkoako Foru Aldundiko jasangarritasun saila aritu dira elkarlanean eskolako familiekin batera.
Elizalde Herri Eskolak larunbateko zenbait irudi helarazi dizkio HITZAri, eta argazki galeria bat egin du horiekin.
