Eusko Jaurlaritzaren ikastaro batean aditu modura aritu dira udal langileak
Oiartzungo feminismo teknikaria eta udal arkitektoa izan dira hizlariak, eta hirigintza eta genero ikuspegia izan dituzte ardatz.
Oiartzungo udal arkitektoa eta feminismo teknikaria Eusko Jaurlaritzak antolatutako Perspectiva de género en el planteamiento territorial urbanístico ikastaroan aditu moduan aritu dira “herriko hirigintzan genero ikuspegia txertatzeko lanketa gainontzeko udalerrientzat eredugarria delako”.
Duela bi urte hasi zen Oiartzungo Udala herriko kale zein plazak ikuspegi feministatik modu integralean aztertzen eta garatzen “orain arteko hirigintza ereduak aintzat hartu ez dituen emakumeen eta kolektibo zaurgarrien premiak ere erdigunean jartzeko”. Era berean, hirigintza feminista praktikara nola eraman ere landu dute Arragua eta Elizaldeko auzogune berrien garapenean.
IVAPek (Administrazio Publikoaren Euskal Institutuak) eta EVETUk (Lurralde eta Hiri Ikasketarako Euskal Eskolak) antolatutako formakuntzak bi helburu nagusi ditu: batetik, lurralde eta hirigintza plangintzan eta jarduketan genero ikuspegia txertatzeari buruzko oinarrizko ezagutzak eskuratzea, eta, bestetik, genero ikuspegia txertatzea plangintza, lurralde jarduketan zein hirigintza jarduketan.
Oiartzungo Udalak ponentzia bat aurkeztu du gai horietan izandako esperientzia azalduz; zehatzagoak izate aldera, Elizaldeko auzogune berriko eta Arraguako planeamendu proiektuetan genero eta ingurumen irizpideak ezartzeko udalak izan duen esku hartzea izan dute hizpide, zehaztutako erronkak, erabilitako metodologia, lorpenak eta zailtasunak, kasu.
