Gazteek hartuko dute euskal errepresaliatuen eskubideen aldeko lekukoa
Oreretako Gazte Asanbladak bat egingo du ostiralean Sare Herritarrak eta Etxerat elkarteak deitutako Azken Ostiralarekin. Ordu aldaketa egin dute, hilabete honetakoa 19:00etan izango da.
Sare eta Etxerat elkarteak antolatuta martxoko Azken Ostirala. Asanblada feministak hartu zuen lekukoa.Oreretako Sare Azken Ostirala ate joka da berriro, udako oporraldiaren ostean. Euskal errepresaliatuen eskubideen defentsaren lekukoa eskuz esku ari da pasatzen, eta Sare Herritarrak eta Etxerat elkarteak antolatutako iniziatibak, Oreretako Gazte Asanbladaren babesa jasoko du hilabete honetan.
Aldaketarekin dator, ordutegian, gainera. izan ere, antolatzaileek azaldu dutenez ordu erdi aurreratu dute zita eta 19:00etan egingo dute, Gau Beltzaren ospakizunarekin bat ez egiteko. Lanean jarraitzeko beharra nabarmen jarri dute antolatzaileek, “ezinbestekoa da salbuespen legediak bertan behera utzi eta lege arrunta aplikatu arte”.
Ohi bezala, Herriko Plazan egin dute hitzordua eta herritar guztiak deitu dituzte parte hartzera.
Sare Herritarrak eta Etxerat elkarteak egin dute aurrerapena, gainera, eta azaroan, kristau komunitatearekin batera antolatuko dute Azken Ostirala. Azarokoa, ohiko ordutegiarekin egingo dute, 19:30ean. Abenduan, berriz, hainbat jarduera antolatu dituztela Gabonen bueltan jakinarazi dute. Aurrerago emango dituzte horien gaineko xehetasunak.
