Sokatira herrikoia, Euskararen Egunaren hamabostaldia ospatzeko
Pump Systemak eta Errenteriako Udalak txapelketa herrikoia antolatu dute datorren azaroaren 30erako. Herritarrei sei laguneko taldeak osatzeko deialdia egin diete.
Pump-ek Lezon antolatu eta jokatutako herri proben irudi bat. Sokatiraren zaleek hitzordu garrantzitsua izango dute Errenteria-Oreretan datorren azaroaren 30ean (igandea da), ikusle zein partaide gisa. Pump Sistemak eta Errenteriako Udalak indarrak batu baitituzte beste behin, eta Lehen Sokatira Txapelketa antolatu dute igande goiz horretarako (12:00etan hasiko da). Euskararen Egunaren hamabostaldiaren barruan kokatu dute herri kirol desafio hori, antolatzaileen arabera, “festa eta euskal giroan egun zoragarria pasatzeko” asmoz.
Agertoki paregabe eta ezin hobea izango du lehiak, Zumardia izango baita joko zelaia. Eguraldi txarra eginez gero, Fanderiako Agustina Otaola pilotalekura lekualdatuko lukete.
Herritarrei deialdia egin diete antolatzaileek, taldeak osatu eta parte har dezaten. Kirol elkarteak, auzo elkarteak, ikastetxeak, kuadrillak… Hala nahi duten guztiek izango dute txoko bat azaroaren 30ekoan, ez zaio inori aterik itxiko. Hori bai, partaide guztiak 18 urtetik gorakoak beharko dute izan. Taldeak sei lagunekoak izango dira, hiru emakume eta hiru gizonez osatutakoak. Partaide guztien artean Gaztelu jatetxean bazkari edo afari bat zozkatuko da.
Izena emateko helbide honetara idatzi beharko da. Bertan, taldearen eta arduradun baten izenak eta kontakturako telefono zenbakia zehaztu beharko dira.
Egun biribila izango da, sokatiraz gain, Errenteria-Orereta eta Donostiaren arteko Herri Kiroletako erronka bat ere izango baita ikusgai Zumardian.
