Venezuelari babesa erakutsi nahi izan diote Oiartzunen
Zenbait eragilek deituta, elkarretaratzea egin dute Venezuelari babesa erakuste aldera. 'Eraso inperialistaren aurka, elkartasuna Venezuelarekin' lelopean elkartu dira.
Urte erdi inguru igaro da ia AEB Ameriketako Estatu Batuek armada Karibe itsasoan hedatu zutenetik “narkotrafikoari aurre egiteko”. Orduz geroztik AEBek Venezuelatik irtendako zenbait ontzi bonbardatu dituzte, eta tentsioa handitzen joan da. Are, Washingtonek Venezuelan jarduten duten petrolio ontzien aurkako zigorrak ere ezarri ditu.
Urte hasieran Nicolas Maduro Venezuelako presidenteak elkarrizketa bat eman zion Venezolana de Television kateari, eta han azaldu zuen AEBek gobernu aldaketa eragin nahi dutela Venezuelan. Horretaz gain, baina, presidenteak gehitu zuen AEBek Venezuelako petrolioa kontrolatu nahi dutela.
Iragan larunbatean egoera okertu, eta AEBk Venezuelari eraso egiteaz gain, preso hartu zituen Maduro eta haren emazte Cilia Flores. Egun horretako arratsaldean bertan egin zuen agerraldia Donald Trump AEBetako presidenteak, eta jakinarazi zuen Washingtonek hartuko duela Venezuelaren kontrola “trantsizio seguru bat” egin daitekeela baieztatu arte.
Maduro eta Flores gaur (astelehena, hilak 5) 18:00etan eramango dituzte New Yorkeko auzitegi federal baten aurrera. Egoera horren aurrean, Euskal Herriko zenbait txokotan elkarretaratzeak egin dituzte Venezuelari babesa erakutsi asmoz; baita Oiartzunen ere. Zenbait eragilek deitu zuten atzo elkarretaratzea, eta dozenaka lagunek erantzun zioten deiari.
Eraso inperialistaren aurka, elkartasuna Venezuelarekin leloa zuen pankartaren atzean bildu ziren herritarrak, eta Vanesa Ziaurritzek egin zuen irakurketa.
“Gertakari hauek guztiz neurrigabeak dira, eta ez dituzte inondik inora nazioarteko legedia eta Nazio Batuen Erakundearen karta errespetatzen”, ekin zion Ziaurritzek. Hots, gehitu zuen, Euskal Herritik munduko herri eta pertsona guztien burujabetza aldarrikatuko dutela “ezinbesteko printzipio gisa”. Era berean, azpimarratu zuen inork ez duela Venezuelar herriaren gaineko erabakirik hartu, hori Venezuelar herriari soilik baitagokio.
Irakurketan, beste gauza batzuen artean, irmoki adierazi zuen Ziaurritzek “guztiz onartezina” dela Maduro eta Floresen bahiketa. “Maduro aske utzi eta Venezuelara itzultzea behar beharrezkoa da egoera bideratu ahal izateko”, jarraitu zuen.
Noski, agerraldian Venezuelako herriari elkartasuna adierazi nahi izan diote, bai eta haien autodeterminazioa, instituzioak, subiranotasuna eta lurralde osotasuna errespetatzeko eskatu ere. “Estatu Batuek Venezuelari egiten dizkion erasoen aurrean gizarte mobilizazioa funtsezkoa da”, erantsi zuen.
Horrela amaitu zuen hitzartzea Ziaurritzek: “Eraso inperialisten aurrea, Venezuelak burujabetza. Gora Venezuela libre! Venezuela aurrera!”.
