'Ahots laborategia' egingo du EHAZE Antzerkizale elkarteak Altzibarren
Hilaren 17an eta 31an izango dira bi saioak. Lehena Peru Galbete eta Idoia Hatxek gidatuko dute, eta bigarrena, berriz, Laura Penagosek.
Peru Galbete eta Idoia Hatxe. EHAZE Euskal Herriko Antzerkizale Elkarteak Neguko Ahots Laborategia antolatu du Oiartzunen. Oiartzungo Udalarekin elkarlanean antolatu dute egitasmoa, eta ekinaldi hori “antzerkizale eta kuskusero guztientzako ahotsen topaleku” izan dadin nahi dute.
Altzibar auzoan zabalduko duten lokalean izango dira saio horiek hilaren 17 eta 31an; izan ere, leku horretan dokumentazio zentro fisikoa martxan jartzeko lehen urratsak ematen ari direla aurreratu dute.
Aipatu moduan, bi laborategi egingo dituzte: lehen saioa Peru Galbete eta Idoia Hatxek gidatuko dute, eta, bigarrena, haatik, Laura Penagosek. Hilaren 17ko saioan, beste gauza batzuen artean, norbere ahotsa besteenekin harremanetan jarri eta hitzetatik harago duen boterea arakatzeko aukera izango du hala nahi duenak. Inprobisazio jolasen bidez soinu piezak sortuko dituzte.
Penagosen saioan, alabaina, hegazti migratzaileen iruditegi eta mugimenduetatik abiatuta ahots eta gorputzaren adierazpen aukera ikertuko dituzte. Talde lanak izango da, eta soinu oihu kolektibo bat sortuko dute.
Bi ikastaroak irekiak direnez, ez da aurretiazko esperientziarik zein ahots lanketarik izan behar. Hilaren 15a baino lehen erreserbatu behar da plaza mezu elektroniko bat idatzita edota 722 89 87 95 zenbakira mezu bat bidalita. Ikastaro bat egiteko 15 euro ordaindu behar dira, baina biak egin nahi dituenak 25 euro ordaindu beharko dituzte. EHAZEko bazkideek, ikasleek eta egoera zaurgarrian dauden pertsonek 10 euro ordainduko dute bi ikastaroak egiteagatik, eta bat egiteko, berriz, bost euro. Ordainketa ikastaroan bertan edota aurretiaz adierazitako zenbakira Bizuma egin behar da.
Ikastaroak 10:00etan hasiko dira, eta saioak amaitu ondotik bazkaria egingo dute.
