Errege eguneko loteriak 200.000 euro utzi ditu Oiartzunen
Mamut merkatalguneko administrazioak zenbaki irabazledun dezimo bat saldu du, eta, beraz, 06703 zenbakidunak 200.000 euro irabazi ditu.
Hilaren 6an jokatu zen Errege eguneko loteria, eta pozik da Ana Arruabarrena, haren administrazioan saldu baitute zenbaki irabazlea duen dezimo bat. 06703 zenbakia izan da lehen saria, eta dezimo bat saldu dute Mamut merkatalguneko administrazioan. Gauzak horrela, 200.000 irabazi ditu dezimodunak.
Garaipenaren biharamunean, pozik agertu da Arruabarrena, “sorpresaz” hartu baitzuen albistea.
Zozketa egin berritan deitu zuten Arruabarrena Estatuko Loteria eta Apustuen Erakunde Nazionaletik esateko zenbaki sarituarekin dezimo bat saldu zutela, eta, beraz, 200.000 euro lortu zituela irabazleak. “Pozik gaude, eta tokatu zaiona ere pozik egongo da. Gainera, herrian erori baldin bada, hobeto”, gehitu du.
“Tokatzea zaila da, eta tokatzen denean poza ematen du”, jarraitu du Arruabarrenak.
Alabaina, ez da soilik irabazlea pozik dagoena, gaur goizeko lehen ordutik jendea baitago ilara egiten Mamut merkatalguneko administrazioan. “Hori da publizitaterik onena [zenbaki sariduna duen dezimoa saltzea]. Sumatzen da eragina; gaur goizetik, esateko, jendea ilara egiten ari da, eta salmentak ere igotzen dira. Dena ondo etortzen da”, amaitu du.
