Dantzariei, herriaren aitortza
Mikel Esnaolari eta Ane Jaunarenari aitortza ekitaldia egin zien Lezoko Udalak abenduaren 29an, herritarren partaidetzarekin.
Aitortza ekitaldian izan zirenen talde argazkia.Lezoko Udala Azaroaren 30ean Mikel Esnaola Gipuzkoar Erako Euskal Herriko VII. Txapelketaren garaile izan zen Hondarribian, eta Ane Jaunarena hirugarren. Horren harira, Lezoko Udalak eta herritarrek harrera eta aitortza egin zieten abenduaren 29an bi dantzariei. Udaleko ordezkariez gainera, haien lagun eta senideak izan ziren Gurutze Santuaren plazan egindako ekitaldian (irudian).
2025a handia izan da lezoar dantzarientzat: Esnaolaren eta Jaunarenaren emaitza bikainaz gain, Maren Galvezek eta Gorka Granadok osatutako bikoteak bigarrenez irabazi zuen urriaren 18an Segurako Euskal Herriko Dantza Txapelketa. Horiez gain, herrietako dantzaldi eta txapelketetan arrastoa utzi zuten joan berri den urtean herriko dantzariek.
