Emakumeen Eguneko herri kirol erakustaldiarekin lehertuko da festa
Elizalde eskolak 50 urte bete ditu aurten, eta handira ospatu nahi dute. Urte guztian zehar egingo dituzte ekintzak, eta igandean izango da lehena.
Elizalde eskolak 50 urte beteko ditu 2026 honetan. Hori ez da egunero ospatzen den zerbait, eta horren jakitun da eskola bera ere. Horregatik, urte guztian zehar zenbait jarduera egingo dituzte urteurren hori behar bezala ospatzeko, eta igandean (martxoak 8) emango diote hasiera jarduera sortari.
Emakumeen Eguna da igandean, martxoak 8, eta nesken herri kirol erakustaldia egingo dute eskolako patioan, 18:00etan, “Emakumeen Nazioarteko Egunarekin bat eginez”.
Ekitaldi horretan maila handiko hiru kirolari ariko dira: Amalur Arbelaitz Elizalde eskolako ikasle ohia, Patricia Martin eta Uxue Ansorregi. Bide horretan, azaldu dute Oiartzungo Udalaren eta Elizalde eskolaren babesarekin antolatutako hitzorduak ordubete inguruko iraupena izango duela, eta zenbait diziplina uztartuko dituela.
Emanaldiak hiru zati nagusi izango ditu:
- Emakumezkoen euskal pentatloia: kirolariek harri bola altxatzea, aizkora, trontza, txingak eta korrika probak.
- Harri jasotzea: emakume harri jasotzaileak hainbat harri jasoko dituzte erakustaldian zehar.
- Trontza herrikoia: herritarrek parte hartzeko aukera izango dute, eta irabazleentzat garaikurrak egongo dira.
Eguraldi aldakor samarra dabil azken bolada, eta horren aurrean antolatzaileek azpimarratu dute eguraldi txarra eginez gero ekitaldia eskolako frontoian egingo dela, eta esertzeko aulkiak jarriko dituztela.
Azkenik, Elizaldek herritar orori luzatu die bertaratzeko gonbidapena.
