'Mineralen bila' eta 'Iparra galdu gabe' jarduerak, Arditurrin
Apirilaren 3an mineralen jarduera egingo dute, eta apirilaren 5ean, berriz, orientazio jolasa. Izena eman behar da bi kasuetan.
Udaberriko oporrak heltzear dira, eta, ondorioz, baita lagun, senide edota familiarekin denbora gehiago pasatzeko egunak ere. Une horien bidelagun izan nahi du Arditurri parketxeak, eta jai egun guztietan meategiko bisitak eskaintzeaz gain, Mineralen bila ibilaldi gidatua eta Iparra galdu gabe orientazio jolasa antolatu dituzte.
Jardueretan lehena mineralena izango da; apirilaren 3an izango da (ostirala), eta mendi ibilaldi gidatua egingo dute Aiako Harriko natura parkeko eremuan barrena. Bertan, Arditurri meatzaritza gunean, alegia, ustiatu ziren mineralen eta meategien arrastakoak ikusteko aukera izango dute hala nahi dutenek.
10:00etan abiatuko da ibilaldia, eta saioa gaztelaniaz izango da. Sei euro balio du jarduerak, baina lau euro, aldiz, hamabi urtetik beherakoentzat.
Bi egun geroago (apirilak 5, igandea), baina, orientazio jolasa egingo dute Arditurri parketxetik abiatuta. Ordu eta erdi inguruko iraupena izango du, eta hiru kilometro inguruko ibilbidea egin beharko dute parte hartzen dutenek.
Bi hizkuntzetan izango da jarduera, eta jarduerak bost euroko prezioa du –hamabi urtetik beherakoentzat, hiru euro–.
Aipatutako bi jardueretan izena emateko 943 49 42 48 edo 688 89 50 68 zenbakietara deitu edota mezu elektroniko bat bidali behar da.
Azkenik, nabarmendu dute Arditurri parketxea eta meategia Aste Santu zein Pazko Aste guztian zehar zabalik egongo dela 10:00etatik 14:00etara, apirilaren 7an izan ezik.
