PSE-EEk "kezka eta ezinegona" adierazi ditu zubiaren itxieragatik
Kexu dira Gabierrota eta Fanderia auzoak lotzen dituen zubiaren itxieragatik. "Presaz" jokatzeko eta zubiaren konponketa bizkortzeko eskatu diote udalari.
Errenteriako PSE-EEk “kezka eta ezinegona” adierazi ditu Gabierrota eta Fanderia auzoak lotzen dituen zubiaren itxierak eragindako egoeraren aurrean.
Bide horretan, sozialistek udalaren “aurreikuspen eta planifikazio falta” salatu dituzte. Horrela diote: “Arazo hau ez da berria; urteetan zehar EH Bilduk azpiegituretan adabakiak jartzea erabaki du behin betiko irtenbide bat eman beharrean. Arazoa konpondu beharrean, behin behineko esku hartzeetan oinarritutako estrategia horrek zubiaren narriadura larriagotzen lagundu du”.
Era berean, PSE-EEtik diote “bereziki larria” dela “aspaldidanik zubiaren egoeraren berri izan ondoren zubia erabat ixtea saihestuko lukeen esku hartze bat garaiz bultzatu ez izana”. Gainera, nabarmendu dute “utzikeria” horren “ondorio zuzena” dela pertsona askoren mugikortasunerako “funtsezko urrats bat etetea”.
Hots, sozialisten iritziz, “onartezina” da egoera horretara iritsi izana “kudeaketa eskas” batengatik. Diotenez, azpiegitura publikoak baldintza egoki eta seguruetan mantendu behar dira, “are gehiago auzoen arteko oinarrizko loturak direnean”.
Horregatik, Errenteriako Udalari eskatu diote “presaz” jokatzeko eta zubiaren konponketa bizkortzeko, “herritarrak gardentasunez informatu ditzala epeen inguruan, bai eta prebentziozko mantentze plan bat ezar dezala horrelako egoerak berriro gerta ez daitezen”.
