Sareren barrikotea eta Bizardiaren ibilaldi neurtua, besteak beste, apirilean
Oiartzungo Udalak herriko eragileekin batera apirilerako ondu duen egutegia kaleratu du. Ikusi ekitaldien zerrenda albistean.
Bihar amaituko da martxoa, eta, ondorioz, apirilera begira jarri da egutegia honezkero. Noski, kultur agendarentzat ere hilabete berri bat izango da, eta urteko laugarren hilabetean oiartzuarrek hamaika ekitaldiz gozatzeko aukera izango dute herrian.
Dagoeneko aurreratu dutenaren arabera, haur eta gaztetxoen hitzorduak izango dira nagusi apirileko lehen hamabostaldian, eta txikienek zinemaz, antzerkiaz eta hainbat tailerrez eta saioz gozatzeko aukera izango dute Abaraxka ludotekaren, Luberri geologia museoaren eta udalaren eskutik.
Gainera, gaztetxoentzako txangoak eta mendi bueltak ere antolatu ditu topalekuak.
Alabaina, oporrak bukatuta ere izango dute etxeko txiki zein gaztetxoen beste zenbait proposamenez gozatzeko aukera.
Hileroko Done Eztebe eliza eta Arizmendienea etxe museoa ezagutzeko bisita gidatuek eta erretiratuentzako seiko urreko karta saioak zein kafe tertuliek ez dute hutsik egite, eta, urteroko zita batzuk ere izango dira apirilean: Sarek antolatzen duen barrikotea apirilaren 11n izango da Elorsoro udal kiroldegian; Abaraxkaren “gure hilak oroitzeko eguna” Ibargain parkean izango da 18an; Olarriren dantzari eguna 25ean izango da, eta 26an, berriz, Gurutzeko Bizardia elkarteak antolatzen duen ibilaldi neurtua izango da.
Esandakoez gain, Labore Oarson kooperatibaren batzar orokorra egingo dute, eta Jakoba Errekondoren hitzaldira bertaratzeko aukera izango da. Gainera, Oiartzun Burujabek Oiartzungo kultur ekosistema birpentsatuz saioa egingo du.
Era berean, Landetxen ikusgai izango diren filmen artean Sorda ikus entzunezkoa izango da, berriki hiru Goya irabazi dituena.
Musikazaleek, bestalde, Kalakan & Berçaits Anaiak taldeen kontzertuaz eta Hezur Berriak bertso saio literario musikatuaz gozatzeko aukera izango dute, eta histori zaleek, berriz, Trikuharri kultur elkarteak antolatutako hainbat hitzaldi, mahai inguru, film eta ibilaldiaz disfrutatu ahal izango dute.
Apirileko agenda osoa ikusteko, egin klik hemen.
