Kirol Sarirako hautagaiak proposatzen has daiteke gaurtik
Hilaren 30era arte egongo da bozkatzeko aukera. Sariduna UKABek, udalak eta herriko kirol elkarteek osatzen duten kirol aholku kontseiluak, aukeratuko du.
Joxemari Mitxelenak jaso zuen 2025eko Kirol Saria. Urrian ospatuko dute Kirol Astea Oiartzunen “jarduera fisikoa eta bizitza aktiboa eta osasungarria sustatzeko helburuarekin”, eta egitasmo horretako hitzordu esanguratsuenetako bat da Kirol Saria.
Sari horrek herriko kirol arloan nabarmendu diren pertsona eta taldeak aitortzea du helburu, eta horretarako herrian kirola sustatzeko egindako lana, kirol ibilbidea edota lortutako emaitzak hartzen dituzte kontuan.
Kirol Saria jasotzeko hautagaiak aukeratzeko proposamenak egiteko aukera izaten da, eta gaur ireki da horretarako epea. Bi astez egongo da zabalik, hilaren 30era arte, eta online, kiroldegiko sarreran edota Herritarren Arreta Zerbitzuko bulegoan jarritako kutxen bitartez eman daiteke bozka.
Bi asteren buruan jasotzen dituzten proposamen guztien artean aukeratuko du irabazlea UKABek, udalak eta herriko kirol elkarteek osatzen duten kirol aholku kontseiluak, alegia.
Saria banatzen hasi direnez geroztik, honakoak jaso dute saria: Girizia elkarteko kirol sailak, Periko Sanroma Haurtzaro atletismo taldeko sortzaileak, Artaso elkarteak Xanistebanetako sokatira txapelketa herrikoia antolatzeagatik, Ane Asensio atletak, Alain Isasa kenshiak, Guruzne Azpiroz arraunlari ohiak, Koldo Fernandez Oiartzun Kirol Elkarteko lehendakariak, Alex Bargalló judokak, Maialen Oiartzabal eskiatzaile akrobatikoak eta Joxemari Mitxelena Axeia pilotari izanak eta entrenatzaile denak.
