Euskal eskultura taularatuko dute Landetxen, etzi
Eskultura irakurketaren performancea eta 'Euskal eskultura bizirik' erakusketaren dokumentala aurkeztuko ditu igandean (hilak 19) Pagoarte elkarteak. 19:00etan izango da, Landetxen.
Bizirik dago eskultura Oiartzunen. Bizirik dago euskal eskultura, eta horren alde lan egiten dihardu Pagoarte elkarteak aspaldian. Iaz, 2025eko azaroan hain zuzen, Euskal eskultura bizirik egitasmoa egin zuten herrian, eta horri jarraipena emango diote etzi, hilaren 19an (igandea), hitzordu bikoitza antolatu baitute herritarrentzat.
Azaroko jardunaldietan, eta hiru astean zehar, Oiartzundik zein Euskal Herri osotik bertaratutako zenbait eskultoreren lanak jarri zituzten Arizmendienako lorategian zein San Juan kaperan, eta eskultura egitasmoaren oinarrian izanik, zenbait ekitaldi egin zituzten Pagoarteren ekimenez, hala nola, erakusketak, bisita gidatuak edota behin-behineko eskulturak sortzeko saioak.
Jarduera horiek, euskal eskultura erdigunean jartzeaz gain, sareak sortzeko ere balio izan zuten, herrian hainbat proiektutan daudenak eta adin guztietako herritarrak batu baitzituen.
Mikel Mendizabal Pagoarteko kideak berretsi du iaz egin zuten jarduera zerbait berezia izan zela; “orain arte ez da horrelako ezer egin euskal eskulturaren inguruan”, eta, beraz, prozesu guztia dokumentatzea pentsatu zuten. Esan, eta baita egin ere. Igandean izango da emaitza ikusteko aukera, Euskal eskultura bizirik erakusketaren dokumentala aurkezteaz gain, eskulturaren performacea egingo baitute Landetxen.
Saioa YouTuben, inork gal ez dezan
19:00etan izango da saioa, eta egindako lana herriari gerturatu nahi diotenez, Interneteko zuzeneko bidez ere transmitituko dute. Bestela, sarrerak.oiartzun.eus helbidean erosi behar dira gonbidapenak, sei euroan.
Nekane Martiarena ere asteburuko hitzordua antolatzen ari da, eta gauza gehiegi aurreratu ezin baditu ere, kontatu du performanceak hiru zati nagusi izango dituela, eta zuzeneko musika ere egongo dela. “Herriko musikariak, dantzariak eta antzerki taldeko gaztetxo batzuk egongo dira oholtzan, gure asmoa ere bazelako belaunaldi ezberdinetako eta diziplina ezberdinetako jendea nahastea”, azaldu du.
“Zenbait kontzeptu zalantzan jartzen ditugu. Kontua ez da zerbait artea den edo ez eztabaidatzea. Sormen mugimendu espresibo bat da eskultura, eta lortu nahi duguna da jendea ez harritzea horrelakoak ikusten dituenean”, jarraitu du Mendizabalek.
Martiarenak ere ildo berari heldu dio, eta gaineratu du badakiela ez dela “horren erraza” jendea eskulturara hurbiltzea. “Azaroan eskultura erakusketa egin genuenean jendea eskulturara ekarri beharrean, eskulturak kalera atera genituen. Oraingo honetan ere eskultura da nagusi, eta haren inguruan sortzen da beste guztia”.
Igandean ere hala egingo dute, baina azaroan egin zuten erakusketa osatzeko zera izan zuten oinarrian: berdintasuna. Hartara, erakusketa osatu zutenean bi zatitan banatu zuten; alegia, batetik, Oiartzungo zein Oarsoaldeko bizilagunek egindako eskulturak jarri zituzten, baina baita Euskal Herri osotik etorritako jendearenak ere. “Hor emakumearen presentzia handia zen. Emakumearen presentzia ez da handia euskal eskulturan, eta guk hori nabarmendu nahi izan dugu egindako lanetan”, gehitu du Martiarenak.
“Aurrera begira ez dakigu zer gertatuko den, baina ez harritu hemendik denbora batera beste zerbaitekin baldin bagatoz”, aurreratu dute.
