Elkarlana eta jolasa nagusi Elizalderen herri ginkanan
50. urteurrena ospatzeko jarduera andana antolatu ditu Elizaldek. Hurrengo hitzorduan Ander Imaz, Unai Amiano eta Unax Landa izango dira protagonista.
Iragan igande arratsaldea ahaztezina izango da Elizalderen komunitatea osatzen duten kideentzat. Lehengo astean herri ginkana eta festa egingo zituztela aurrera zuten, eta orain, jakinarazi dute “elkarlana eta festa giroa” izan zirela nagusi dozenaka herritar bildu ziren hitzorduan.
Arratsaldeko lauretan eman zioten hasiera ekitaldiari, eta izena eman zuten kideak zazpi pertsonako taldeetan banatu zituzten. Elizalde auzoa bera zazpi gunetan banatu zuten ginkana egiteko, eta talde bakoitza, hortaz, leku batetik abiatu zen. Taldeek proba bat gainditu ahala asmakizun bat ebatzi behar zuten, eta horren emaitza zen hurrengo gunea zein zen jakitea.
Bestalde, antolatzaileek kontatu dute gune bakoitzak erronka bat ezkutatzen zuela, baina denek “trebezia, elkarlana eta umorea” eskatzen zutela. Finean, partaideek honako zirkuitua osatu zuten: Ibargain parkea, Kontzejupe plaza, Doneztebe plaza, Euskal Herria plaza, Landetxe plaza, Tolaitako kantxa eta Madalensoro.
Herri ginkanari lehia izaera kendu eta herritartasun izaera eman nahi izan zioten Elizaldekoek, eta horrexegatik, proba amaituta, denak eskolako patioan elkartu eta ginkanan zehar lortutako piezekin 50. urteurreneko irudia –50 zenbakia– osatu zuten.
Festarekin jarraitu zuten gero, eta horretarako Elizaldeko dantza taldeko kideek Koloretako sustrai urteurrenaren abestiaren koreografia irakatsi zieten bertaratutakoei, eta, noski, dantza egin zuten gero denek batera. Arratsaldea amaitzeko, musika lagun zutela, merienda egin zuten.
Elizaldek hamaika ekitaldi antolatu ditu 50. urteurrena ospatzeko, eta hurrengo deialdia hilaren 29rako egin dute;, egun horretan Ander Imaz, Unai Amiano eta Unax Landak tako jartze erakustaldia egingo dute LH3tik DBH2ra bitarteko ikasleentzat.
Jarraian, Elizaldek HITZAri helarazi dizkion zenbait irudi.
