Artisautza gose dira
Gaurko (hilak 1, ostirala) 16:30ean zabalduko ditu ateak Merkatuzarrek Azo!ka Artisautza Topagunearen etxe izateko.
Euren postuak prestatzen izan dira artisauak goizean. Gaur (hilak 1, ostirala) zabalduko ditu ateak Errenteria-Orereta eta artisautza berriz ere elkarlotuko dituen topagunea, Azo!ka Artisautza Topagunea. Atzoko (apirilak 30, osteguna) Agustinak Zentroko profesionalen bilkuraren ondoren, gaurtik eta igandera arte dozenaka artisauren sormena ikusi, ukitu, eta erosteko izango da Merkatuzar aretoaren luze-zabalean. Artisautza gose da herria. Ereintza elkarteak 39 urtez antolatu zuen Euskal Herriko Eskulangintza Azokaren oinordeko-edo izenda daiteke Azo!ka. Gaurko 16:30etik bisitatu ahalko da.
HITZA goizean izan da Merkatuzarren. Artisauak eurentzako propio prestatutako egurrezko postuetan egindakoak lasai eta txukun jartzen ari ziren. Zer egiten duten ondo-ondo azaldu nahi dute, bistarako erakargarri diren edukiez gain, hitzez ere zertan ari diren azaltzeko prest daudelako. Honako ordutegiarekin izango da zabalik Azo!ka gaurtik igandera:
- Gaur (hilak 1, ostirala): 16:30etik 20:30era.
- Bihar (hilak 2, larunbata): 11:00etatik 14:00etara, eta 16:30tik 20:30era.
- Etzi (hilak 3, igandea): 11:00etatik 14:00etara.
Postuez gainera, hainbat ekintza osagarri prestatu dituzte antolaketaren atzean diren Errenteriako Udalak, Agustinak Zentroak, Amaia Arregi Gipuzkoako Foru Aldundiko Ekonomia Sustapenerako sailak, eta Ereintza elkarteak. Horien artean tailerrak, zuzeneko erakustaldiak, edo zuzeneko podcast bidezko emanaldiak ere badira. Jarraian ikus daitekeen zerrendan horiek guztiak noiz egingo diren ikus daiteke.
Azo!ka Artisautza Topagunea. Ekintza osagarriak.
Gaur (hilak 1, ostirala)
- 16:30. Inaugurazioa.
- 17:00-19:00. Tailerra. ‘Zumezko elkarlaneko eskultura’. (Idoia Cuestarekin).
- 19:00-20:30. Erakustaldia. ‘Materia bizia: artilearen artisau-prozesua’. (Paz Mesarekin).
Bihar (hilak 2, larunbata)
- 11:00-14:00. Topaketa irekia. ‘Lagunartean ehuntzen’.
- 11:30-13:30. Tailerra. ‘Zumezko elkarlaneko eskultura’. (Idoia Cuestarekin).
- 12:00-14:00. Erakustaldia. ‘Materialak ere erabakitzen du’. (Aitor Martinezekin).
- 16:30-18:30. Tailerra (30 minutuko 4 saio): Petlotas ardi-ko.
- 16:30-18:30. Erakustaldia. ‘Raku teknika japoniarra’. (Xenpelar tailerren eskutik).
- 18:30-20:30. Tailerra. ‘Harizko korapiloak’. (Xenpelar tailerren eskutik).
Etzi (hilak 3, igandea)
- 11:00-12:30. Tailerra. ‘Sortu zure amuletoa’. (Herri Arte Eskolaren eskutik).
- 12:00-13:00. Zuzeneko podcast-a. ‘Haria ez dadila eten’.
- 11:00-13:30. Tailerra. ‘Harian (II)’. Lur Live Natura Elkartearen eskutik.
