'Auzoaren Arima' proiektura aurkezteko azken eguna, hilaren azkena
Hiru herriak biltzen dituen proiektuak aurkeztu behar dira, eta ez, beraz, herri bakoitzeko bat. Lanak egiteko 10.000 euroko aurrekontua izango da.
Auzoaren Arima proiektuak proposamenak aurkezteko epea ireki du, hain justu, Lezoko, Pasai Antxoko eta Oiartzungo Altzibar auzoko espazio publikoetan elkarrekin lotutako hiru esku hartze artistiko egingo dituen pertsona edo talde bakarra hautatzeko. Diotenez, helburua espazio horiek eraldatzea eta interesgune iraunkor berriak sortzea da, oinezkoen joan etorria sustatzeko eta tokiko merkataritzari balioa emateko, “auzo bakoitzak behar duen arima itzuliz”.
Lehiaketa horretan sormen eta kultura industrien arloko pertsona fisiko zein juridikoek har dezakete parte; hala nola, artistak, beren obrak egiten dituzten diseinatzaileak, espazio publikoko esku hartzeko artistikoetako espezialistak, artisauak edota sortzaileak. Alabaina, nahitaezkoa legezko gaitasun osoa izatea eta kontratatzeko gaitasunik gabe ez egotea. Era berean, nabarmendu dute pertsona fisikoak, pertsona juridikoak eta aldi baterako enpresa elkarteak onartzen direla.
Haatik, salbuetsita geratzen dira ondasun erkidegoak eta nortasun juridiko propiorik gabeko beste edozein forma juridiko.
Parte hartzaile bakoitzak proposamen orokor bakarra aurkeztu ahal izango du, hiru kokapenak barne hartzen dituena. Beraz, ez da onartuko proposamen partzialik, kokapenetako bat edo bi bakarrik kontuan hartuta.
Hiru esku hartzeak egiteko 10.000 eurok aurrekontua izango da, BEZ barne, eta aurkezteko epea hilaren 31n amaituko da.
Proposamenak helbide elektroniko honetara bidali behar dira, gai honekin: ‘Auzoaren Arima 2026 Lehiaketa – [Proiektuaren izena]’. Mezu horretan bi fitxategi erantsi behar dira PDF formatuan: bat dokumentazio administratiboarekin ([Proiektuaren izena] _ADMIN.pdf) eta bestea proposamen sortzaile anonimoarekin ([Proiektuaren izena] _PROIEKTUA.pdf). Bertan, memoria kontzeptuala, memoria teknikoa, irudikapen grafikoa eta aurrekontu banakatua jasoko dira.
Balorazio irizpideak edota informazio gehiago nahi duenak, egin dezala klik esteka honetan.
Kokapenak
- Lezo: Kale Nagusia, Gurutze Santuaren Plaza.
- Pasaia: Pasai Antxo, Biteri Plaza.
- Oiartzun: Altzibar auzoa, Mikelete kalea.
