Astelehenetik aurrera, 'Etorkizunari begira' erakusketa ikusgai
Elizalde Eskolak ondutako erakusketa Elorsoron egongo da ikusgai hilaren 11tik 17ra bitartean. Espazioen eraldaketa eta hezkuntza komunitatea ditu oinarri bildumak.
Elizalde Eskola bete-betean dago murgilduta 50. urteurrenaren ospakizunetan, komunitatearentzat ez baita soilik atzera begiratzeko ospakizun bat; “etengabe gaude atzera eta aurrera egiten. Aurrera egiteko derrigorrezkoa da nondik gatozen jakitea, baina nora joan nahi dugun zehazteko ezinbestekoa da ortzimuga marraztu eta aurrera begiratzea”, diote.
Hori horrela, datorren astelehenetik aurrera (hilak 11) Etorkizunari begira erakusketa jarriko dute ikusgai Elorsoro kiroldegiko bilera gelan. “Erakusketak hezkuntza komunitatea elkarrekin eraikitzen ari den eraldaketa partekatzea erakusketa du helburu, ikastetxeko espazioen berritzea eta auzolana ardatz hartuta”, azaldu dute.
Erakusketa hori Elizalde Egunera arte (hilak 17) egongo da zabalik, eta bertaratzen direnek Haur Hezkuntzako, Lehen Hezkuntzako eta Derrigorrezko Bigarren Hezkuntzako kanpo zein barruko espazioetarako proiektu eta egitasmoak gertutik ezagutzeko aukera izango dute.
Lau atal
Etorkizunari begira lanak lau zati ditu, eta horietan eskolaren orainaldi eta etorkizuna uztartzen dira. Transpatioa, DBHko patioaren eraldaketa, etorkizuneko eraikina eta auzolana eta komunitatea dira atalak, eta horietan informazio ezberdina aurkituko dute bisitariek.
Horretaz gain, Elizaldetik nabarmendu nahi izan dute erakusketan ikusiko den eraldaketa ez dela soilik fisikoa edo arkitektonikoa: “Erakutsiko diren proiektuak azken urteetan ikasle, irakasle, zuzendaritza, familia eta herriko eragileekin batera garatu diren prozesu parte hartzaile eta sortzaileen emaitza zuzena dira. Guztion artean nahiak hitzetan jarri dira, kezkak partekatu dira eta espazioak beste modu batera pentsatzeko aukerak sortu dira”.
Diotenez, ibilbide hori marrazteko garaian ezinbesteko elementu izan dira sorkuntza komunitarioa, auzolana eta bide laguntza, baina baita jasotako diru laguntzak ere.
Erakusketa astebetez egongo da ikusgai, eta astelehenetik ostiralera bitartean 17:00etatik 20:00etara bisitatu ahal izango da. Astelehenean aurkezpen ofiziala egingo dute, eta larunbatean, berriz, itxita egongo da. Azkenik, Elizalde Egunean 10:00etatik 13:30era egongo da erakusketa azkenengoz ikusteko aukera.
