Ikastola txiki eta klandestinoen gaineko dokumental bat egingo dute
Ikus-entzunezkoaren helburua da ikastola txiki guztien historia eta Pasaia-Lezo Lizeoaren osaera aztertzea. Dokumentala osatzeko, argazki bila ari dira sustatzaileak.
Pasaia eta Lezoko Udalak, Euskal Herriko Ahotsak proiektuko kideen laguntzarekin, badiako ikastola txiki eta klandestinoei buruzko dokumental bat ari dira prestatzen. Ikus-entzunezkoaren helburua da ikastola txiki guztien historia eta Pasaia-Lezo Lizeoaren osaera aztertzea. Dokumentalerako elkarrizketa mordoa egin dituzte jada, baina sustatzaileak material grafiko bila ari dira orain, testigantzei bizitasuna emateko. Egitasmoa Pasaia-Lezo Lizeoa ikastolaren 50. urteurrenaren barrukoa da.
Proiekzioa osatu ahal izateko, pasaitarrei garai horietako argazkiak bidaltzeko eskatu diete. Zehazki, 1960tik 1979ra bitarteko irudiak behar dituzte:
- Antxoko ikastola: 1960-1976.
- Donibaneko ikastola: 1965-1976.
- San Pedroko ikastola: 1966-1976.
- Trintxerpeko ikastola: 1967-1976.
- Pasaia Lizeoko lehen urteetakoak: 1976-1979 (eraikinaren inaugurazio egunera artekoak).
Argazkiak dituztenek, udal liburutegietan joateko aukera izango dute, hilaren 20tik 27ra bitartean. Liburutegietan irudi horiek eskaneatuko dituzte momentuan bertan, gero bueltan eraman ahal izateko.
