Gazte izandakoen bazkaria, Gaztañoko festetako hirugarren egunean
Ekainaren 23an, ohi moduan, Su gaua egingo dute eta horrekin bukatuko dira auzoko festak.
San Juan sua Gaztaño Ez du sekreturik jada Gaztañoko jaietako egitarauak, jai batzordeak zabaldu baitu jada festetako hirugarren eguneko egitaraua. Horrekin batera, ekainaren 23an jaiei ginga jarriko dien Su Gauaren egitaraua ere zabaldu du.
Ekainaren 14an, gazte izandakoen bazkaria izango da ekitaldi garrantzitsuenetako bat; Bukagaitz elkartean izango da hori, 14:00etan hasita. adinekoei auzoaren alde egin duten eta egiten jarraitzen duten lana aitortuko diete. aurretik toka eta bote txapelketa izango dira.
Haurrena izango da arratsaldea; 17:00etan haiei begirako apar festa antolatu du jai batzordeak, baita ur txirrista ere. Eta bukatzeko, klasiko bat bihurtu den Gaztañotik Mundura, herrien arteko elkartasuna adierazteko bidaia gastronomikoa egingo dute 20:00etatik aurrera.
Su Gaua
Jaien ginga jartzeko ekainaren 23an Su Gaua ospatuko dute Gaztañon. Lehen hitzordua, erabilera anitzeko espazioan izango dute 18:30ean Zumba saioarekin. 20:00etatik aurrera, Iker Rodriguez DJak jarriko du giroa, eta arratsalde osoan zehar, afari merienda egiteko aukera izango da parrilan egindako txorizo, eta saiheskiarekin. Edatekoak ere izango dira.
Iluntzearekin batera, eta bideo emanaldiaren ondotik, Arramenditik behera joango dira su eramaileak eta sorginak eta sua piztu. Suzko zezena eta su artifizialak ere ez dira faltako.
