IXO Teatroaren 'Harea' antzezlanarekin, Bilbora
Luix Mitxelena oiartzuarraren proiektua da Ixo Teatroa, eta orain 'Harea' lanaren aretoko bertsioa taularatuko dute.
IXO Teatroa antzerki konpainiaren Harea lanak Bilboko Pabellon 6 antzokian egingo du geldialdia ekainaren 4tik 7ra bitartean.
Luix Mitxelena oiartzuarrak eta Arnatz Puertasek eratutako konpainia da aipatutakoa, eta antzerki fisikoaren bitartez gatazka sozialak, hausnartketa pertsonalak, eta, euren bizitza ikusteko modua eta gizakiak ulertzeko era taularatu nahi dituzte.
Harea ekainaren 4, 5, 6 eta 7an ikusteko aukera egongo da, eta honakoa da sinopsia: bi gaztek, hegazkin istripu baten ostean, uharte bakarti batean amaituko dute nora jo ez dutela. Bertan oso gauza gutxi izango dituzte: maleta bat eta zuhaitz bat Zuhaitz haren gerizpean jaioko da bien arteko laguntasuna. Alabaina, dena hankaz gora jarriko da lehenengo fruta eroritakoan. Izan ere, munduan ezer gutxi balio duen hori urre bilaka daiteke errealitate berri horretan…. eta, nork ez luke borrokatuko urre apur baten truke?
Hitzik gabeko antzezlana izango da, konpainiaren kodeari jarraiki. Sortzaileek aipatu dutenez, tragikomedia horrek gizakiak duen anbizioari buruz hitz egin nahi du, hitzik erabili gabe. Umore Azokan estreinatu zuten lana, eta oraingoan aretoko bertsioaz gozatzeko aukera izango da.
Bi pertsonaiak Mitxelenak eta Puertasek gorpuztuko dituzte, eta gehitu dute sorkuntza kolektiboa izan bada ere, Estitxu Zalduaren kanpo begirada izan dutela. Jantziak Betitxe Saituak diseinatu eta egin ditu; Adrian Garcia de los Ojos arduratu da soinu espazioaz, Javier Tirado eszenografiaz, eta Jaione Azkona argiztapen diseinuaz.
Ekainaren 4, 5 eta 6ko emanaldiak 19:30ean izango dira, eta ekainaren 7koa, berriz, 19:00etan. Sarrerak esteka honetan eskura daitezke.
