Donibane, harro igoerako play-offean egindako lanagatik
Lehen Maila Nazionalera igoera lortu ez arren, Gironako esperientzia "bizia, gogorra eta aberasgarria" izan dela adierazi du klubak.
Jakina den bezala, Donibane Eskubaloia taldeko gizonen talde nagusiak Lehen Maila Nazionalera igotzeko play-offa jokatu zuen iragan asteburuan Gironako Palafrugell herrian. Garbi etxeko taldea izan da play-off horren garailea, eta Kataluniako taldea izango da 2026-2027 sasoian Lehen Maila Nazionalean izango dena. Igoera lortu ez arren, Donibanerentzat esperientzia “bizia, gogorra eta aberasgarria” izan dela adierazi du Pepelu Ramos Fernandez arrosen prestatzaileak.
Donibaneren lehen partida iragan ostiralean izan zen, Zaragozako Balonmano Dominicos taldearen aurka. Arrosak intentsitatearekin atera ziren pistara, defentsan sendo eta erasoan arin. Osagai horiekin partidako lehen minutuetan nagusi izan ziren. Hala ere, urduritasunak, bidaiak eta beroak eragina izan zuten minutuak pasa ahala. Aurkariak joko sistema doitu zuen, eta Donibanek esfortzu fisiko handiagoa eskatzen zuten aldaketa taktikoak sartu behar izan zituen. Arrosek ezin izan zioten eutsi erritmo horri, eta Balonmano Dominicosek lortu zuen garaipena bigarren zati on bat jokatu ondoren (33-39). Galdu arren, partida ondo hasi zutenaren sentsazioarekin geratu ziren sanjuandarrak, baina nekearen poderioz, akats asko egin eta aurkariak aprobetxatu egin zituen.
Larunbatean hil ala biziko partida jokatu zuten arrosek Burgosko Villa de Arandaren kontra. Asobal Ligako taldearen filiala da. Lehen taldearekin jokatzen eta entrenatzen duten jokalariak izan arren, Donibanek aurpegia eman zuen neurketa guztian. Partidan berdintasuna izan zen nagusi, eta azken minutuetara aldeko markagailuarekin iritsi zen talde arrosa. Hala ere, aurkariek ondo bukatu zuten norgehiagoka, eta garaipena lortu zuten (28-30).
Azkenik, igoera lortuta zutela, Garbi antolatzaile eta txapeldunaren kontra jokatu zuen Donibanek. Dudekin atera ziren kantxara, baina bi taldeek topera jokatu zuten. Partida bizia, irekia eta espekulaziorik gabekoa izan zen. Donibanek hobetu egin zuen partidak aurrera egin ahala, eta emozioz betetako bukaera baten ondoren, garaipena lortu zuten arrosek (34-33). Play-offa aho zapore onarekin itxi zuten.
Igoera lortu ez arren, Gironatik egitura handiagoa duten taldeen aurka nor baino nor aritu izanaren “poztasunarekin” joan ziren, aurkarien eta antolatzaileen errekonozimendua jasoz, kantxan eta harmailetan izandako jarreragatik.
Donibanek, gainera, Garbiren antolakuntza lan “ikaragarria” goratu du: fan zone bat jarri zuten, harmaila gehigarriak, eserleku guztiak beteta eta zale guztien babesa, “betiere beste taldeekiko errespetu osoz”.
Talde arrosak adierazi du play-off hau ez dela bukaera bat, baizik eta puntu eta jarrai bat beren bidean. “Talde xumea gara tamainan, baina balio handiekin, ilusio askorekin eta anbizio indartuarekin esperientzia honen ondoren. Gogo eta esperientzia gehiagorekin itzuli gara, konbentzituta hazten jarraituko dugula. Orain uda aprobetxatzeko momentua da, datorrenerako pilak kargatzeko”, esan du klubak.
Azkenik, klubak esker on hitzak izan ditu jokalari guztiekiko, Donibane Gironako harmailetan babestu zuten zale guztiekiko eta play-offean egoteko aukera izan ez zuten horiekiko. “Familia arrosa eta bere masa soziala handitzen ikustea beste garaipen bat da”.
