Palestina erdigunean jarri du Gora Herriak-ek
Martxan da Donibaneko Bixi-Bixi elkarteak antolatzen duen kultur zikloaren IX. ekitaldia. Sanjuandarren helburua da herrien borrokak eta izateak ezagutaraztea, horiei ahotsa emanez.
Martxan da Donibaneko Bixi-Bixi elkarteak antolatzen duen Gora Herriak jaialdia. Aurtengoa internazionalismoa ardatz duen kultur zikloaren bederatzigarren ekitaldia da, eta bere helburua da beste herrien borrokak eta izateak ezagutaraztea eta horiei ahotsa ematea. Kubako, Portugalgo, Saharako, Kurdistango, Irlandako, migrazio afrikarreko, Argentinako eta Abya Yala Amerikako jatorrizko herrialdeetako istorioak Donibanera ekarri ondoren, Palestina erdigunean jarri du aurten eragile sanjuandarrak. Palestinaren aldeko hautua egitea «derrigorrezkoa» zela adierazi du Xabier Alegria jardunaldien antolatzaile eta Bixi-Bixiko kideak: «Ekitaldi honetan elkartasun adierazpenak nahi genituen. Palestinarekiko hurbiltasuna dugu, askotan bihotzetik datorrena, eta ezagutzatik ere landu nahi dugu, Palestina ezagutzeko».
Palestinaren genozidioa maiz Gazaren «txikizioarekin eta sarraskiarekin» lotzen dela baietsi du Alegriak. Haren ustez, Palestinako herriaren borroka ezaguna da, baina herrialde horren kultura, literatura, kantua edo poesia ere Donibanera ekarriko dituzte. «Askotan esaten dugu maitatzeko ezagutza behar dela, eta hori da gure helburua». Palestinarren ahotsak lau haizetara zabaltzeko, Bixi-Bixik egitarau zabala ondu du, ekainaren 13ra bitartean. Horien artean hitzaldiak, ekitaldi kulturalak, kontzertuak, haurrentzako jarduerak edota azken eguneko ekitaldiak topatuko dituzte Donibanera gerturatzen direnek.
Hilaren 21ean hasi zen IX. Gora Herriak, aurkezpen ekitaldiarekin. Fouad Baker jurista eta FLDPko militante palestinarra Palestinako lurraldearen inguruan aritu zen. Alegriak jakinarazi du ikaragarria izan zela saio hori: «Jende askorentzat ikaragarria izan zen ulertzea nola palestinarrak beren lurraldera heltzen diren olibondo batek eusten dion tamainan, eta nondik ateratzen duten erresistentzia gaitasun hori gaur egungo perspektiban, etsipenerako txartel guztiak dituztenean».
Egitarau oparoa
Orotara, bost hitzaldi antolatu dituzte Bixi-Bixikoek. Horietan lehena asteartean izan zen, eta emakume palestinarrei ahotsa emateko, Diana Shams idazle palestinarraren liburua izan zuten hizpide. Gazaren txikizioaren erdi-erdian idatzi zuen obra Shamsek. Bigarrena atzo izan zen, eta kolonialismoaren eta sionismoaren aferak mahai gainean jarri zituzten. Hirugarrenean herri erresistentziaren inguruan arituko dira, eta laugarrenean Hamas izango dute hizpide. Azkenik, Genozidioa gelditu hitzaldia egingo dute. Lizeoko DBH4ko ikasleekin ere lanketa egingo dute, Joe Saccoren komikiak baliatuta.
Alderdi kulturalari helduta, ekainaren 7an Palestinako Sol Band Gaza musika talde palestinarra Donibaneko Juanba Berasategi aretoan izango da, Jon Maia, Olatz Salvador eta Iker Lauroba musikariekin batera. Aurten, gainera, poesiari ere aterpe egingo diote Donibanen. Mohammed el-Kurd poetaren Rifqa liburuaren inguruan arituko dira ekainaren 11n, Kultur Aterpean.
IX. Gora Herriak ixteko, azken eguneko ekitaldiak egingo dituzte ekainaren 13an. Aurten jaia hitza kendu dute azken eguneko ekitaldietatik, «ospakizun keinuak testuinguru honetan» ez baitira egokienak. 12:30ean elkartasun horma irudi bat egingo dute Santiago plazan, eta kalejiran joango dira ondoren Meipira. Palestinako jakiak, dantza eta musika ez dira faltako.
Palestinaren aldeko elkartasun keinuak ez dira Donibanera mugatu. Hilaren 23an Antxoko Basari elkarteak Palestinaren aldeko jaia antolatu zuen, eta bihar (larunbata) Fouad Baker San Pedroko Erti aretoan izango da.
IX. Gora Herriak
Ekainak 2
- 19:00etan, Kultur Aterpean.
- Hitzaldia: Herri erresistentzia: antolakuntza eta garapena, Txente Rekondo nazioarteko adituarekin.
Ekainak 4
- Goizean: Lizeoko ikasleekin Joe Saccoren Palestinari buruzko komikia, Julen Gabiria itzultzaileak aurkeztuta.
- 19:00etan, Kultur Aterpean.
- Hitzaldia: Hamas erresistentzia protagonista berria. Urriaren 7tik hanko egoera Ekialde Hurbilean.
- Tareq Baconiren liburuaren aurkezpena, Dabid Lazkanoiturburu GARAko kazetariarekin.
Ekainak 7
- 18:00etan, Juanba Berasategin.
- Kontzertua: Gora Palestina Askatuta! Jon Maia, Olatz Salvador, Iker Lauroba eta Sol Band Gazarekin.
Ekainak 8
- 19:00etan, Kultur Aterpean.
- Hitzaldia: Palestinako emakumeen borrokaz eta erresistentziaz. Nadie Nemeh palestinar aktibista eta Bermeoko alkatearekin eta Diana Shams Gazako idazlearekin. Ainara Lertxundi GARAko kazetariak aurkeztuta.
Ekainak 9
- 19:00etan, Herriko plazan.
- Haurrentzako tailerra eta ikuskizuna, Porrotx eta Zaputxin pailazoekin.
Ekainak 10
- 19:00etan, Kultur Aterpean.
- Solasaldia: Genozidioa gelditu! Elkartasun eraginkorrari begirako gakoak. Ibon Meñaka Gernika-Palestinako kidearekin, Julen BDZ mugimenduko kidearekin, Mahmoud Al-Saher idazle palestinarrarekin eta Marck Nicholson Britainia Handiko Palestine Action taldeko kidearekin.
Ekainak 11
- 19:00etan, Kultur Aterpean.
- Poesia eta musika: Rifqa, Palestinaren ahotsa, Mohamedd el-Kurden liburua oinarri. Xalba Ramirez, Peru Galvete eta Rifqa euskaratu duen Eider Beobiderekin.
Ekainak 13
- Azken ekitaldia, Meipin.
- 12:30: Palestinarekiko elkartasun kalejira, Santiago plazatik Meipira.
- 14:00: Herri bazkaria palestinar menuarekin.
- 16:00: Ekitaldia nagusia: Agurra, Palestinako dantzak eta haurren dantzak.
- 16:30: Musika palestinarra: Nur eta Ahmed.
- 17:30: Koiuntura + arte.
- 18:30: Kantaldia.
