Eskertza Eguna, Intxixu Trail eta zenbait auzotako festak ekainean
Hilabetero bezala, aisialdiko agenda osatua prestatu dute herritarrek ekainerako. Adin eta zaletasun guztientzako zer egina izango da.
Ekainaren lehena da gaur, astelehena, eta horrek zera esan nahi du: beste hilabete batez dozenaka jarduera antolatu dituztela Oiartzungo eragile zein aisialdiko taldeek herritarrentzat. Hilabete hasiera honetan eguraldia ez da zoragarria izango, baina hori ez da inolako oztoporik izango musikaz, festaz eta kirolaz gozatzeko.
Izan ere, datorren asteburuan Biyurrienearen Eskertza Eguna, Itturri merkatari elkartearen Kalia arratsaldea eta Intxixu Trail izango dira. Ergoiengo jaiak ere izango dira, eta Kantagiltzak edota Hazi, Hezi, Bizi Egunak ere izango dute euren tartea. Gainera, udaburuko sua zein San Juan kaleko eta Altzibarko jaiak ere izango dira ekainean zehar.
Ikastetxeentzat ere hilabete berezia izango da: hilaren 7an Haurtzaro Ikastolaren Eguna izango da, eta hilaren 20an, berriz, Elizalde eskolaren 50. urteurreneko aitortza ekitaldia, herri bazkaria eta jaialdia izango dira.
Era berean, Auntxa trikitixa eskolak hilaren 13an egingo du jaialdia, eta Abaraxka udal ludotekak zein gazte topalekuak agur jaiak egingo dituzte.
Landetxen, berriz, antzerkian aritzen diren ikasleen ikasturte amaierako emanaldi mordoxka bat izango dira, eta Zinegoak nazioarteko LGBTQ+ zinemaldiaren urteroko emanaldia ere jasoko du eraikinak. Noski, dokumentalak, film laburrak eta pelikulak ere izango dira hilabete honetako agendan.
Literaturari dagokionean, Arizmendienean eta udaletxeko areto nagusian liburu aurkezpen bana egingo dira, eta III. Antxin Ezkerro Memorialeko pilota partidak ere jokatuko dituzte datozen egunetan. Azkenik, Zaintzadiko hilabeteroko zenbait hitzordu, larunbateroko Arizmendieneako bisita gidatuak eta Abittuk ostegun eta ostiralero antolatzen dituen Ttipi-Ttapa ibilaldiak ere ez dute huts egingo.
Ekaineko aisialdiko agenda osoa ikusteko, egin klik hemen.
