Pentsio publiko duinak eta zaintza sistema aldarrikatu dituzte, enegarrenez
Pentsio publiko duinak aldarrikatu dituzte enegarrenez, eta Sanmarkosene eta Jesusen Bihotzako langileak ere batu dira zaintza sistema aldatzeko.
Hilabeteko lehen astelehenarekin bat eginez, Duintasunak pentsio duinen alde kaleak hartu ditu. Hamarnaka herritar bildu dira pentsio publiko duinak aldarrikatzeko, eta era berean, zaintza sistema aldatzeko. Gaurko mobilizazioan Sanmarkosene eta Jesusen Bihotza zaharren egoitzetako langileak batu dira, haiek ere baitute zer aldarrikatu. “Zaintzarako eta lanerako baldintza duinak eskatzen dituzte haiek ere, eta gure bultzada eman nahi diegu”, adierazi dute Duintasunekoek. “Zaintzarekin negoziorik ez”.
“Enegarrenez, zergaren diru partida pentsiodunen eta herritarren eskuetatik kanpo gelditu dira. Desproportzio argia dago. Gainera, kostuen indizeek gora egin duten bitartean, soldatak ez dira igo”. 2025ean, zerga bilketa 20.234 milioi eurora iritsi zen, PZEZak eta BEZak diru sarreren igoeran eragin handia izan dute. Zerga sarreren %70 inguru langileen, pentsiodunen eta bestelako herri-sektoretatik lortzen dituztela zehaztu dute.
“Diru-sarreren igoera are eta handiagoa izango litzateke soldatak bidezkoagoak eta, beraz, zenbateko handiagokoak izango balira”. Maiatzaren 7an, ostegunarekin, Euskal Herriko ehunka pentsiodunek bat egin zuten Euskal Herriko Pentsiodunen Mugimenduak deitutako manifestazioarekin. Gaurko mobilizazioan Eusko Jaurlaritzari ozen ohukatu diote lehenbailehen pentsioak osatu dezala.
“Egoera ekonomikoak eta diru sarrera fiskalek aukera ematen ziotela Gasteizko gobernuari parekatzea bere gain hartzeko. Bizitzaren kostuaren igoera areagotu denean, gutxieneko pentsioak LGSarekin parekatu arte osatzeko premia larria da”. Nazioarteko egoera dela eta, aurten inoiz baino justifikatuagoa dagoela gaineratu dute. “EAJ eta PSE-EE iruzurrak zarete”, ozen oihukatu dute.
Iztietako anbulatorioan, mobilizazioa
Duintasunekoek Osakidetzak bizi duen egoerarekin kezkatuta jarraitzen dute. Iztietako anbulatorioko larrialdi zerbitzuaren kupoa %100nean beteta dago, eta arazoak izaten jarraitzen dute herritarrek. Iztietako anbulatorioan 24 orduko eta zazpi eguneko larrialdi zerbitzua aldarrikatzeko elkarretaratzea deitu dute. Hilaren 12an, ostiralarekin, 11:30ean bilduko dira Iztietako anbulatarioan.
“Iztietakoa nahiko zaharkituta dago, eta udako ordutegien murrizketarekin batera, Donostiako Bengoetxea kaleko larrialdietara edota Donostia Ospitalera joatea behartuta gaude”, salatu dute. Urtarrilean, Oiartzungo eta Errenteria-Oreretako udalek Lartzabalgo anbulatorioaren handitzea adostu zuten.
Datorren ostegunean, hilaren 10an, Reina aretoan adinekoen ongizate eta afektibitate sexualari buruzko hitzaldia antolatuko dute. Luis Otermin sexologoak gidatuko du, eta hainbat gai landuko ditu.
