Lau urte eta erdiko kartzela zigorra Irungo irakasleari
Gipuzkoako Probintzia Auzitegiak errefusatu egin du irakaslearen errekurtsoa, eta, beraz, lau urte eta erdiko kartzela zigorra berretsi.
Oiartzungo Feministen Asanbladak Donostiako epaitegiaren aurrean egindako elkarretaratzeko irudi bat. Oiartzungo Feministen Asanblada Euskal Autonomia Erkidegoko Auzitegi Nagusiak berretsi egin du Gipuzkoako Auzitegiak Irungo institutu bateko irakasleari martxoan ezarri zion 4 urte eta erdiko kartzela zigorra, “16 urtetik beherakoengana Internet bidez hurbiltzea eta baldintzapeko mehatxuak egitea egotzita”. Irakasleak errekurtsoa jarri zuen, baina Auzitegi Nagusiak atzera bota du hori. Gainera, “sexu jazarpeneko delitu arin baten egile” izateagatik ere zigortu zuten, eta 20 eguneko lokalizazio iraunkorra ezarri.
Auzitegiak ohar bidez jakinarazi duenez, frogatutzat jo dute 2023-2024 ikasturtean lan egiten zuen ikastetxeko hiru ikaslerekin harremanetan jarri zela sare sozialen bidez eta haiengana hurbildu nahi zuela “sexu izaerako trufak” esanez eta haietako biri elkartzeko “proposamen serioak” egin zizkiela.
Akusatuak epai horren aurkako errekurtsoa aurkeztu zuen Euskadiko Auzitegi Nagusiaren aurrean, eta, asmo nagusi gisa absoluzioa eskatzeaz gain, subsidiarioki, zigorrak ezartzea, gutxieneko lege luzapenean. Ministerio Fiskala errekurtsoaren aurka agertu zen, eta Gipuzkoako Auzitegiaren ebazpena berresteko eskatu zuen.
Ezarritako kartzela zigorrei dagokienez, euskal organo judizial gorenak gogorarazi du 16 urtetik beherakoengana hurbiltzea internet bidez sexu harremanak izateko delitua urtebetetik hiru urtera bitarteko espetxealdiarekin edota hamabi hilabetetik 24 hilabetera bitarteko isunarekin zigortuta dagoela, eta kasu horretan espetxeratzea erabaki zela “hurbilketa telematikoaren izaera bortitz eta luzeagatik”. Gainera, proportzionatutzat jotzen ditu 16 urtetik beherakoei Internet bidez sexu-harremanak izateagatik ezarritako bi urteko kartzela-zigorrak, irakasleen arteko harremanari dagokion asimetria eta biktimen adinaren eta hauskortasun emozionalaren inguruabarrak direla eta.
Halaber, Gipuzkoako Auzitegiak mehatxu delituagatik ezarritako sei hilabeteko kartzela zigorra eta adostutako gainerako zigor nagusi eta osagarriak ere berretsi ditu.
Azkenik, jakinarazi dute epaia ez dela irmoa eta Auzitegi Gorenean helegiteak aurkez daitezkeela.
