Saltokiak berritzen laguntzeko, diru laguntzak
Komertzioa berritu, ekipamendu berria erosi, webgune bat sortu edota online salmenta martxan jarri nahi dutenek eskatu ahal izango dute laguntza.
Oarsoaldea garapen agentziak jakinarazi duenez, saltokia berritu, ekipamendu berria erosi, webgune bat sortu edota online salmenta martxan jarri nahi duten merkatariek laguntza ekonomikoak lortzeko aukerak dituzte. MEC 2026 programarekin, merkataritza establezimenduek zein merkataritzarekin lotutako zerbitzuek egindako inbertsioen zati bat berreskuratu ahal izango dute. Diotenez, laguntzak autonomoei eta ETEei daude zuzenduta, baldin eta jarduera nagusia merkataritza txikia edota merkataritzarekin lotutako zerbitzua bada. Eeskaera egiteko azken eguna irailaren 15a izango da.
Horretaz gain, gehitu dute programak negozio baten modernizazioarekin lotutako inbertsioak hartzen dituela barne, eta establezimendua bera hobetzeko egindako lanak eska daitezkeela. Bestalde, digitalizazioarekin lotutako inbertsioak ere barne hartzen ditu; alegia, ordenagailuak, kudeaketa programak, webgunea, edota online dendak bezalako tresna teknologiko batzuk ezartzea.
Gehienez 10.000 euro
Diru laguntzak inbertsioaren %40 estaltzen du, eta kasu batzuetan %52ra arte irits daitezke; establezimendu bakoitzak gehienez ere 10.000 euro jaso ahal izango ditu. Puntu gehigarri horiek lortzeko aukera izango dute, besteak beste, merkatari elkarte bateko kide diren establezimenduak, azpiegitura edota ekipamendua berritzeko inbertsioak egiten dituztenek edota energia komunitate batean parte hartzen dutenek.
Alabaina, gehitu dute baloratuko dutela merkataritza sektorerako prestakuntza programetan parte hartu izana, emakumeen enplegu egonkorra sustatzea, berdintasun edota adiskidetze planak edukitzea, Kontsumobideko Arbitraje Sistemari atxikita egotea edota Berriz Enpresa programan parte hartu izana.
Azkenik, antzinatasunak ere saria izango du, eta 10 urte baino gehiagoko ibilbidea duten establezimenduek puntu gehigarriak lor ditzake, bai eta bezeroei euskaraz arreta ematen dieten merkatariek ere Bai Euskarari, Bikain edota Euskaraz Barra-Barra bezalako egiaztagirien bidez hori frogatzen badute.
Garapen agentziatik azaldu dute inbertsioak 2025eko urriaren 1etik 2026ko irailaren 15era bitartean egindakoak izan behar direla. Zalantzak argitzeko edota informazio gehiago eskatzeko 943 49 41 29 zenbakia eta helbide elektroniko hau luzatu dituzte.
