Baso lanak egiten ari dira Gaintxurizketan
Bertako landareak berreskuratzea da lanen helburua, eta horretarako ari dira jardunean. Negu partean bertako espezieak landatzea aurreikusi dute.
Gipuzkoako Foru Aldundia baso lanak egiten ari da bertako landareak berreskuratzeko helburuarekin. Azaldu dutenez, lanak egiten ari diren partzela Gaintxurizketan dago, Alargunatzatik gora. Partzela horretan 2002. urtean Japoniako gaztainondoa landatu zuten otadiaren kontrola bermatzeko eta baso suteen aurrean lurrean erregai gutxi edukitzeko. “Castanea crenatak izan duen bilakaera ikusita, nahiz eta hasierako helburua lortu den, ez du bertako espezien garapena ahalbidetzen. Hori dela eta, bigarren fase horretan egingo dituzten lanekin eremuaren aberastasun ekologikoa handitu nahi dute, eta horretarako soilgune bitartez etorkizuneko espeziek landatuko dituzte”, diote.
Baso lan horien helburu nagusia Jaizkibelgo landareak berreskusatzea da; izan ere, Jaizkibelek Natura 2000 Sarearen Kontserbazio Bereziko Eremu izendapena izateko arrazoi nagusietako bat haritz mota horrek osatzen dituen basoak direla diote. “Gaur egun, baina, ameztiak Jaizkibelgo eremu babestuaren %6 baino ez du hartzen, eta bere azalera potentziala %75ekoa da”.
Aipatutako lanen artean kokatzen da mozketak egitea. Justuki, bertako landareak antzematen dituzten lekuetan egingo dituzte, eta, bestalde, soilguneak sortuko dituzte bertako espezieak ez dauden eremuetan “argia sar dadin eta bertako espeziek bertan landatzeko”.
Azkenik, Lezoko Udalak nabarmendu du lan guztiak Aldundiko basozainek ikuskatu eta kontrolatuko dituztela, eta negu partean eremu horretan bertako espezien landaketak egitea aurreikusi dutela.
