Bihar irekiko dute udako igerilekua
Irailaren 13ra arte egongo da zabalik, eta ohiko bonuak egiteko aukera egongo da. Aurten trafiko aldaketak egunero egongo dira indarrean.
Bihar (hilak 13) irekiko dute Oiartzungo udako igerilekua, eta irailaren 13ra arte, hiru hilabetez egongo da zabalik. Ekainean, abuztuan eta irailean 11:00etatik 20:00etara izango da ordutegia, baina uztailean, berriz, 10:00etatik 21:00etara. Abuztuaren 3a izan ezik, beste egun guztietan egongo da zabalik igerilekua betiere eguraldiak ahalbidetzen badu.
Elorsoro kiroldegiko bazkideek bazkidetzan dute jasota udako igerilekuaren zerbitzua, baina gainerakoek bonuak eta eguneko txartelak erosi ahal izango dituzte. Helduen banako bonuak 108,92 euro balio du; gazteenak edo erretiratuenak 72,66 euro, eta familienak, berriz, 145,20 euro. Alabaina, guraso bakarren edota familia ugarien bonua 101,65 eurokoa izango da. Familia zaurgarrienek, berriz, doan izango dute sarrera.
Eguneko txartelaren prezioa 4,75 eurokoa izango da erretiratuentzat eta 16 urtetik beherakoentzat (5 urtetik beherakoentzat doan izango da), eta 9,3 euro, berriz, 16 urtetik gorakoentzat. Horretaz gain, sarrerak bosnaka erosteko aukera izango da: gazteen sortak 18,79 euro balio du, eta helduenak 37,15 euro.
Trafiko aldaketak
Igerilekua irekita dagoen bitartean, ohiko trafiko aldaketak izango dira herrian: batetik, igerilekuko aparkalekura Elorrondo – Manuel Lekuona – Sibeluts kaleetan barrena joan beharko da, eta, bestetik, ibilgailuak baterian aparkatu beharko dira. Gainera, Rafael Pikabea hiribidetik, Sibeluts kalea Goizueta kalearen parean moztuko da.
Orain artean trafiko aldaketak igerilekua irekitzen zen egunetan bakarrik izaten ziren indarrean, baina, aurten denboraldi osoan mantenduko dira. Hilaren 13tik irailaren 13ra, alegia.
