Lurdes Iriondo oroituko du HarriBeltza elkarteak udako kontzertuan
'Errota zaharretik' emanaldia egingo dute uztailaren 31n, San Esteban parrokian, eta sarrera doakoa izango dela aurreratu dute.
HarriBeltza Hiesaren aurka lanean aritzen den elkartea da, eta berriki Xanistebanen aurreko udako kontzertuaren 30. edizioaren inguruko xehetasunak eman ditu. Aurtengoan, Lurdes Iriondoren omenezko Errota zaharretik emanaldia egingo dute uztailaren 31n, 19:30ean, San Esteban parrokian, eta sarera doakoa izango da.
“Lurdes Iriondoren ahotsak bide bat ireki zuen, ez bakarrik emakume kantari bezala, baizik eta oholtza gainean ageri zen sortzaile eta erreferente kultural gisa”, diote.
Bada, orain, Ainara Ortega Barrenetxea musikariak Gipuzkoako Foru Aldundiaren bidez “ondare hori berriz piztu eta gaur egungo begiradatik oholtzara ekarri du haren kantuak berrinterpretatuz”.
Lanaren harira, honakoa adierazi du Ortegak: “Nik Lurdes Iriondo gure zaharrei galdetutakoan euren begietan ikusten dudanagatik ezagutzen dut: emozio sakon bat azaltzen zaie, esker ona eta tristura eme bat. Uste dut asko falta dutela”.
Ortega abeslaria da, baina harekin batera oholtzan ariko dira Angel Unzu (gitarra), Iñar Sastre (pianoa) eta Juanma Urriza (perkusioa).
