Komunitatearen eguna: "Jendetsua eta hunkigarria"
Elizalde Eskolak 50. urteurrena ospatu du asteburuan, eta besteak beste, aitortza ekitaldia eta kontzertuak izan zituzten.
Iragan larunbatean Elizalde Eskolak 50. urteurreneko ibilbidea ospatzeko ekitaldi nagusia izan zuen: Komunitatearen eguna. Egun osoko egitaraua antolatu zuten, eta haur, gazte eta helduak batu ziren eskolak urte horietan guztietan egindako lanari aitortza egite aldera.
Aitortza ekitaldiarekin eman zioten egunari hasiera, eta Mirari Martiarena ikasle ohiak gidatu zuen saioa. Hitzordu horretan zenbait hitzartze egin zituzten bertaratutakoek, eta, besteak beste, Joana Mendiburu alkateak, jantokiko begiraleek, zuzendaritzako kideek, ikasleek eta gurako elkarteko kideek hitz egin zuten.
Ekitaldia amaituta, eskolako aterpera joan ziren denak festarekin jarraitzeko asmoz, eta 250 lagun inguru elkartu ziren bazkaltzeko. Bazkalostea Eromeri taldeak girotu zuen, eta kalejira bat eginez herriko plazara joan ziren, han Bengo, Dj Eromena eta Eromeri taldeen kontzertuen txanda baitzen.
Xanistebanetan, taberna
50. urteurrena ospatzeko hamaika jarduera antolatu ditu urteurreneko batzordeak, baina hurrengo hitzordu ofiziala irailaren 12an izango dela aurreratu dute.
Data horretan Kulturaniztasunaren eguna ospatuko dute, baina jakinarazi duten orain Xanistebanetako taberna antolatzen hasiko direla “ezinbestekoa” baita “ikasturtean zehar burutzen diren hainbat ekintza auto finantzatzeko, eta, era berean, jaietan herritarrei afari zerbitzu duin eta kalitatezko bat eskaintzeko”.
Uztailean emango dituzte xehetasunak, baina oraingoz tabernarekin laguntzeko prest dauden bizilagunei izena emateko deia egin diete.
