Sanpedroek sanjoanen lekukoa hartuko dute
Hilaren 26tik 30era San Pedro bost eguneko jai giroan murgilduko da. Aurten emakume jostunek jaurtiko dute txupinazoa, 20:00etan.
Asteburuan sanpedrotar askok sanpedroak berotu bazituzten ere, Arrantzale eguna ospatu baitzen larunbatean, ostiralean (hilaren 26an) lehertuko dira ofizialki San Pedroko Jaiak. Barrutiko Jai Batzordeak prest ditu aurtengo ospakizunak, eta ekitaldi eta jarduera mordoa antolatu ditu bost egunez festez gozatzeko. Aurten emakume jostunek jaurtiko dute txupinazoa, 20:00etan, eta LGTBIQ+ ikurrina ere igoko dute alkateordetzaren balkoira. Une horretatik aurrera, barruti morea bost eguneko jai giroan murgilduko da, hilaren 30era arte. Txupinazoaren aurretik ere jarduerak egongo dira, eguna girotzen joateko.
Aurrekari gisa, gaur (astelehena) Sentimendu baten garaipenak. Pasai San Pedroko arraunaren historia 1854-2020 liburua aurkeztuko dute Lonjan, 19:30ean. Liburua Sanpedrotarra Arraun Elkarteak eta Pasaiako Udalak ekoitzi dute elkarlanean, eta Sorginarri udal bildumaren 11. alea izango da. Liburuak bidaia bat eskaintzen du San Pedroko arraunaren iraganean, orainaldian eta etorkizunean barrena. Horrez gain, bihar (asteartea) San Joan suaren inguruko jarduerak egingo dira 22:00etatik aurrera, Lamiak Dantza Taldeak girotuta.
Hona hemen programazioa egunez egun:
Sanpedroak 2026
Hilak 22, astelehena
- 19:30: Sentimendu baten garaipenak. Pasai San Pedroko arraunaren historia 1854-2020 liburuaren aurkezpena Lonjan.
Hilak 23, asteartea
- 22:00: San Joan sua, Lamiak Dantza Taldeak girotuta.
Hilak 26, ostirala
- 17:00: Haurrentzako merienda portuko etxeetan.
- 17:30: Buruhandiak frontoian.
- 18:00: Futbito finala.
- 18:30: Haur danborrada portuko etxeetatik (4-16 urte bitarte).
- 20:00: Txupinazoa emakume jostunen eskutik eta LGTBIQ+ ikurrinaren igoera.
- 22:00: Helduen danborradak Gatzagatik.
- 00:00: Javi DJa oholtza nagusian.
Hilak 27, larunbata
- 11:30: Porrusalda txaranga. Herritarrei dei egiten zaie zuri-gorriz janzteko.
- 12:30: Arando Txiki otxotea herriko kaleetan barrena.
- 17:00: Piratakada frontoian.
- 20:30: Afari herrikoia Arraunlari kalean Txomin Parrillaren eskutik (txartelak aurretik erosi behar dira, 21 euroan).
- 22:30: Rockalean San Pedroko kaleetatik.
- 01:00: Zatekeen taldearekin erromeria oholtza nagusian.
- 03:00: Gonzalo txosnagunean.
Hilak 28, igandea
- 12:00: Helduen Inude eta Artzainak. Ondoren, Bermutekea Boteron.
- 16:00: Haurren frontenis finala.
- 18:30: Helduen pilota finalak. Ondoren, Jose Inazio Murua Elizondo eta bere musika frontoian.
- 00:00: Pixa taldea oholtza nagusian.
- 03:00: La Fulana oholtza nagusian.
Hilak 29, astelehena
- 10:00: Diana txistulariekin.
- 11:00: Licinio Refice meza nagusia.
- 12:00: Haurren Inude eta Artzainak.
- 16:00: Haur eta gaztetxoentzat dantza tailerra Fama eta Txasissen eskutik Herriko Plazan.
- 17:30: Helduen frontenis finala.
- 18:30: Buruhandiak eta erraldoiak dultzaineroekin kaleetan barrena.
- 19:00: Bote-igel txapelketa jubilatuen eskutik Falkonen.
- 20:30: Sutargi taldearekin erromeria Begihaundin.
- 23:00: Hodax eta Garinbo txosnagunean.
Hilak 30, asteartea
- 11:00: Ginkana, Eskubidean planeko haur eta gazteen antolatuta, frontoian.
- 12:00: Buztiña eta Eskamak partida frontoian. Ondoren, haur bazkaria Txokon.
- 15:00: Puzgarriak frontoian.
- 18:00: Goazen Nait frontoian.
- 20:00: Joxe Angel Elizalderekin dantzaldia frontoian. Bitartean, afari autogestionatua frontoian. Jai Batzordeak bokatak eta edariak jarriko ditu salgai.
- 22:00: Zezensuzkoa frontoian.
