"Gure balioen inguruan Oiartzun apur bat gehiago saretu dugu"
Haz, Hezi, Bizi eguna ospatu zuten igandean; taldea zer den eta orain arte egindakoaren berri eman zioten herriari.
Hazi, Hezi, Bizi taldea sortu dute Oiartzunen, eta astebururako antolatu zuten egitarau batekin aurkeztu zioten egitasmoa herriari taldea osatzen duten kideek.
“Aske erabakitzeko; pertsonekin konexio gehiago eta gauzekin konexio gutxiago; zure bertsiorik onenak ez du ezer gehiagoren beharrik; amets gehiago, substantzia gutxiago”. Balio eta asmo horien inguruan hasi ziren igande goizean Oiartzungo norbanako eta eragileak plazan batzen. Pankartak, megafonia, bonsaiak, panel informatiboak, haurren txokoa eta beste horrenbeste zituzten Doneztebe plazaren inguruan.
Ekitaldiari hasieran 11:00etan eman zioten, eta aurkezpenaren ondotik Egiar Otegi Torres eta Kattalin Arabolaza Palomo bertsolarien txanda iritsi ziren. Agurrak abestu zituzten, eta ofizioetan erantzun zieten mendekotasunen inguruko gaiei. Bien bitartean, gainera, Oiarpe eta Mindarako pilotariek hiru partida jokatu zituzten Kontzejupean.
Itxaso Lekuona eta Karlos Ibargurenek azaldu zuten zer den Hazi, Hezi, Bizi, eta haren helburuetan, balioetan eta orain arte emandako pausuetan sakondu zuten.
Bonsaien inguruan jarduteko, zerbait jateko edota mendekotasunei “golak” sartzeko aukera ere izan zen igandekoan, baina baita El Matxunkambo 24/7, June Galardi eta Endika Loiola kantuan entzuteko ere.
“Gure balioen inguruan Oiartzun apur bat gehiago saretu dugu, eta kontsumoen eta dependentzien inguruko hausnarketan sakondu dugu. Aurrerantzean ere, nahi duen ororekin, ildo beretik lan egiten jarraituko dugu”, diote antolatzaileek.
