300 pertsonak ezagutu dute Antxoko geltoki berria
Topoaren Altza-Galtzaraborda tartea eta Antxoko lurpeko geltokia bera uztailaren 18an irekiko dira.
Uztailaren 18an irekiko da topoaren Altza-Galtzaraborda tartea. Egun horretan zabalduko ditu ateak Antxoko lurpeko geltoki berriak. Irekierarako hiru aste geratzen badira ere, Eusko Jaurlaritzako Mugikortasun Jasangarriaren Sailak Antxoko geltoki berria ezagutzeko bisitak egin zituen hilaren 15etik 18ra bitartean, eta 300 pertsona inguruk ezagutu ahal izan dute etorkizuneko geltoki berria.
Euskotreneko eta Euskal Trenbide Sareko profesionalek lagunduta, 11 bisita egin dituzte, eta parte hartu dutenek instalazio berriak ezagutu dituzte, sarreratik hallera eta nasetara. Bisitariek makinisten prestatze probak ere ikusi ahal izan zituzten. Horrez gain, geltokian bertan jaso zituzten lanaren exekuzioari eta trenbide zerbitzu berriari buruzko azalpenak eta xehetasunak.
Susana Garcia Mugikortasun Jasangarriaren sailburuak Antxoko bisitetan hartu du parte, eta positiboki baloratu ditu: “Garrantzitsua da gauzatu dugun lanaren handitasuna ikustea eta baloratzea, bai eta zerbitzu berriari buruzko herritarren ekarpenak entzutea ere”.
Bisitetan parte hartu zutenek azken ukituak falta zaizkion geltokiaren ia behin betiko irudia ezagutu zuten, eta baita sarrera estaliko duen kanpoko markesinaren instalazioarena ere. “Garrantzitsua iruditzen zitzaigun zerbitzua gehien erabiltzen dutenak eta lanak etxe ondoan izan dituztenak izatea geltokia bisitatzen lehenak. Izan ere, azpiegitura hau, gauzatzen ditugun azpiegitura berri guztiak bezala, herritarrek eta herritarrentzat pentsatuta dago”, adierazi du Garciak.
Gainazaleko lanengatik, Antxoko Gure Zumardia berrurbanizatu egin da, “eremu argiagoa” sortuz, azoka zaharra kendu baita. Hamarretxeta eta Gelasio Aranburu kaleen arteko eremuaren behin betiko urbanizazioa bukatuta dago, haur parkea irekita dago, eta plazaren zatirik handiena sanferminetarako erabilgarri egotea aurreikusi dute.
“Hilabete baino ez da geratzen Pasaiak eta Altzak iraultza propioa izateko Gipuzkoak aurten biziko duenaren barruan, maiztasunak 7,5 minutuero eta konexio berriak gehitu ondoren. Hau da, betiko topoa izango dute, baina berrituta eta metroaren maiztasunekin. Antxoren kasuan, hiri berroneratzea oso agerikoa da Gure Zumardian, eta zubibidea desmuntatzen denean bukatuko da”, baietsi du Mugikortasun Jasangarriaren sailburuak.
