Antxoko ibaian izan da lehia
Txalupinen Konkista egin dute lehenengoz antxotarrek, Papineko Gazteriaren egitasmoz. Arrakastatsua izan da lehena, jakin-min handia piztu du ontzien arteko lehiak.
Antxoko Molinao errekako ahateek bisitari bereziak izan zituzten atzo, gutxitan eman diren irudiak jaso zituen HITZAk Marealta inguruan. Ahateena baino, antxotarrena izan zen ibaia, Antxoko piratena. Ekitaldi handi baten agertoki izan baitzen atzo lehenengoz Marealta, eta kasu batzuetan, baita igerileku ere. Txalupinen Konkista egin zuten lehen aldiz barrutiko 24 taldek, eta atzokoak izandako harrera ikusita, sanferminen barruko egitarauan behin betiko txoko bat egingo duela esan daiteke.
Ilusio handiarekin, eta ahots gutxirekin, iritsi ziren atzoko egunera Papineko Gazteriako kideak. Haientzat “tabu” izan den erreka herriari gerturatzea zen atzokoaren asmoa, eta hala izan zen. Inguru guztia jendez lepo bete zen, jakin-min handia piztu baitzuen barkuen konkistak. Ontzi bakoitzean lau lagun aritu ziren (pirataz jantzita), eta lehia binaka izan zen. Probak askotarikoak izan ziren eta taldeak anitzak, ontzi guztiak mistoak izan baitziren eta adinen arteko batez bestekoa 35 urtetik gorakoa izan zen. Gazte eta gazte izandakoek erakustaldi ederra eman zuten.
HITZA atzoko konkistan izan zen, zenbait argazki eta bideo ateratzen. Hona atzoko irudiak:
