Txalupek Antxoko ibaia konkistatuko dute
Papineko Gazteriak Txalupinen Konkista izeneko jarduera egingo du lehen aldiz hilaren 7an, 19:30etik aurrera. Zortzi ontzi arituko dira jolasean Marealtan.
Aurtengo sanferminak berritasunekin iritsiko dira Antxora, eta ez soilik egun bat gehiago izango dutelako. Ohikoak diren jarduerez gain, antxotarrek ekintza berri bat topatuko dute jaietan, Papineko Gazteriak Txalupinen Konkista izeneko jarduera egingo baitu hilaren 7an, San Fermin egunean. Txalupek barrutiko ibaia hartuko dute 19:30etik aurrera, eta hainbat proba egingo dituzte bertan, marea goian dela.
Papinen belaunaldi ezberdinetako kuadrillak biltzen direla, eta gazteagoak direnak gauzak antolatzen eta ahotsa nahiz hitza hartzen hasi direla jakinarazi du Ekain Iribarren gazte taldeko kideak. Antxoko erreka beti «tabua» izan dela adierazi du Iribarrenek. «Zabortegi moduko bat bezala ikusten da, zikina dago eta ez da erabiltzen». Papineko kuadrilletako batek ibaia herriari hurbildu nahi zion, espazio horri erabilera emateko, eta ontzi batzuekin uretan jolas batzuk egitea otu zitzaien. «Harri kozkor» bat bezala hasi zena, errealitate izango da sanferminetan, eta sustatzaileen asmoa da giroa sortzea eta jaiek izango duten egun gehigarrian jarduera berriak eskaintzea.
Lehena izango bada ere, Txalupinen Konkistak harrera bikaina izan du. Espazioagatik eta mareengatik, soilik zortzi ontzik hartu ahal izango dute parte astearteko probetan. Udalak piragua moduko batzuk erosi dituela baietsi du Iribarrenek, eta bakoitzean lau partaide arituko dira, haien artean proba ezberdinak egiteko. Hortaz, 32 pertsona arituko dira lehian Marealtan. Zortzi taldek parte hartuko badute ere, 24 apuntatu zirela jakinarazi du Papineko kideak, eta denentzat espazioa ez dagoenez, «galbahe» bat egin behar izan dute. «Jendeak ilusio handiarekin hartu du, eta marroia izan da taldeak kentzea». Izena eman zuten guztiek parte hartuko ez badute ere, antolatzaileak pozik dira egitasmo berriak herrian izan duen harreragatik: «Zerbait zerotik sortu eta inork ezer jakin gabe 24 talde eta ia 100 pertsona apuntatzea sekulakoa da. Ikaragarria da ikustea herriak nola erantzuten duen. Nire ustez hori da politena».
Arauak
Txalupinen Konkistan parte hartzeko, arau batzuk jarraitu behar izan dituzte antxotarrek. Antolatzaileek bi baldintza jarri zituzten, eta parte hartzeko horietako bat behintzat bete behar zela jakinarazi du Iribarrenek: talde mistoa izatea edo adinen arteko batez bestekoa eginda, 35 urtetik gorakoa izatea. Izan ere, sustatzaileen asmoa da jende heldua ere aritzea eta haien parte hartzea sustatzea.
Bestalde, eta jardueraren gaiari helduz, partaideak pirataz mozorrotu beharko dira derrigorrez. Piratek Antxoko urak bere egingo dituzte.
