Mendialdeko landa lursailak erosteko kanpaina jarri du martxan udalak
Sailen bat saldu nahi luketen lur jabeek abuztuaren 5a baino lehen aurkeztu behar dituzte euren eskaintzak egoitza elektronikoan edo HAZen.
Oiartzungo Udalak mendialdeko landa lursailak erosteko kanpaina jarri du martxan; hortaz, sailen bat saldu nahi luketen lur jabeek abuztuaren 5a baino lehen erregistratu behar dituzte euren eskaintzak. “Ingurumen balioa galtzen arriskuan egon daitezkeen mendialdeko eremuak eta landa lursailak eskuratu nahi dira bertako espezie, baso eta ekosistemen kontserbazioa indartzeko eta bioaniztasunaren galera geldituko duten neurriak sustatzeko, baita egurgintza eredu jasangarriagoa martxan jartzeko ere. Helburu horiek lortzeko, egun udal jabegokoak diren lursailez gain, berriak eskuratu nahi dira”, dio udalak.
Orotara 15.000 euroko aurrekontua du udalak, eta hektareako 3.500 euro ordainduko dituzte gehienez ere. Era berean, baina, diote saltzaileek beren sailen hektareako prezioa zehatu beharko dute udalak jarritako zenbateko maximoa hobetuz. Alabaina, azpimarratu dute hektareako gehienezko prezioa eta aurrekontu osoa gainditzen duten proposamenak zuzenean baztertuko dituztela.
Irizpide ekonomikoei dagokienez, diote hektareako preziorik baxuena duen eskaintzak izango dituela puntu gehien. Irizpide teknikoak, berriz, honakoak izango dira: “eremuak udal jabegoko lursailen batekiko duen gertutasuna, herriko ur sareari egiten dion ekarpena, eremuaren azalera eta babestutako gune batean egotea, interes komunitarioko hainbat kategoria izatea”.
Bete beharreko baldintzak
Aipatutako ezaugarriez gain, lursailek gutxienez hektarea bateko azalera izan behar dute, eta eremuek gastu zein bestelako karga guztiez libre egon behar dute. Gainera, saltzaileek bere gain hartu behar dituzte lurrak besterentzeko sortutako gastuak. Hots, nahi beste lursail aurkezteko aukera dago, betiere lursail bakoitzeko proposamen bakarra egiten bada. –Hemen daude xehetasun guztiak–.
Eskaintzak egoitza elektronikoaren bitartez edota Herritarren Arreta Zerbitzurako bulegoan aurkeztu behar dira abuztuaren 5a baino lehen.
