Trafiko eta aparkaleku aldaketak karmenetan
Jaietan Trintxerpeko mugikortasuna eta aparkalekuak bermatzeko, udalak neurriak hartu ditu hilaren 12tik 20ra bitartean.
Hilaren 15etik 19ra bitartean Trintxerpeko karmenak ospatuko dira, eta Pasaiako Udalak hainbat neurri hartu ditu aldundiarekin eta Pasaiako Portu Agintaritzarekin lankidetzan, ibilgailuen mugikortasuna eta garraio publikoa bermatzeko eta jaietan aparkatzeko aukerak handitzeko.
Urtero bezala, Euskadi etorbidea oinezkoentzat izango da, eta bertako trafikoa itxiko dute. Trintxerpeko etorbide nagusia hilaren 15eko (asteazkena) 10:30ean moztuko da, eta 08:00etan ibilgailurik gabe egon beharko du. Hilaren 20an irekiko da berriz, garbiketa lanak egin ondoren.
Jaiek irauten duten denboran, Euskadi etorbidea goizeko lehen orduan irekiko da trafikoarentzat, 10:30ak arte, zamalanak egiteko eta autobus publikoak normaltasunez ibiltzeko. Autobus zerbitzua bermatzeko helburuarekin, goizeko lehen orduan Euskadi etorbidean ibili ahal izango dira, eta, ondoren, autobusek Aduana kalea (Carbones) zeharkatuko dute, San Pedroraino.
E07 eta E09 lineak Euskadi etorbidean ibiliko dira egunero, 10:30ak arte, igandean (hilaren 19an) izan ezik. Lineak barrutiko etorbide nagusitik doazen bitartean, geldialdi eta ibilbide guztiak egingo dituzte. Errepidea moztuta egongo da, baina autobusek zirkulatu ahal izango dute, ordutegi horietan ez baita aurreikusten jendea egotea edo bertan jarduerak egitea. Aduana kaletik (portua) doazenean, Euskadi etorbideko eta Gudari plazako geralekuak kenduko dira, eta beste bat jarriko da Hospitalilloko aparkalekuan, Euskadi etorbidea 45 parean. Kasu horretan ere ibilbide guztiak mantenduko dira.
E08 lineak ohiko ibilbidea egingo du, goiko auzoak barne, asteazken, ostegun, ostiral eta larunbatean, goizeko 10:00ak arte, eta horixe izango da goiko auzoak hartuko duen azken bidaia. Ordu horretatik aurrera, eta baita igandean ere, ibilbidea beheko aldeetara mugatuko da, gainerako lineetan bezala.
E79 gaueko linea Bidebietan hasi eta bukatuko da (San Pedro etorbidea 25). Gaueko linea bat erabili nahi dutenek Escalerillasen edo Bidebietan egin beharko dute.
DBUSek jakinarazi du 38 linean, Trintxerpe-Altza-Molinao linean, aldaketak egongo direla hilaren 15etik 19ra. Honako geralekuak kenduko dituzte: Euskadi etorbidea-Azoka, Ricardo Arrillaga 6, Gran Sol 3 eta Bordaenea 2. Alternatiba gisa, honakoak gaituko dituzte trafiko etenek irauten duten bitartean: San Pedro etorbidea 49 eta Andonaegi kaleko biribilgunea.
Trafikoa moztuko denez, udalak taxilariekin adostu du behin-behineko geltoki bat gaitzea, zerbitzua ahalbidetzeko. Azkuene kalean egongo da geltoki hori, Euskadi etorbidetik hurbilen dagoen zamalanetarako gunean (Azkuene 2-8).
Aparkalekuak
Feria eremuaren muntaketagatik, ezingo da Zirizako aparkalekuan aparkatu igandeko (hilaren 12ko) 12:00etatik aurrera. Udalak Rodolfoko orubea egokituko du igandean bertan bertakoentzako aparkaleku gisa, portuko sarbidearen ondoan.
Karmenak eta garbiketa lanak bukatu ondoren, hilaren 20an berriro aparkatu ahal izango da Zirizan. Rodolfoko ibilgailuak ere hilaren 20rako kendu beharko dira.
Rodolfoz gain, beste aparkaleku batzuk prestatu dira jaietarako:
Karmengo Ama
Udalak Karmengo Ama ikastetxeko beheko patioa prestatuko du ordutegi hauetan: hilaren 15ean eta 16an 14:00etatik 08:00etara (arratsaldez eta gauez) eta hilaren 17tik 20ra, ostiraleko 14:00etatik asteleheneko 08:00etara (egun osoz).
Hospitalillo
Hilaren 15etik 19ra Lonja eta Hospitalillo artean aparkatu ahal izango da.
Karmengo Amaren lasterketa
Hilaren 19an Karmengo Amaren herri lasterketa jokatuko da, eta zirkulazioa erabat moztuta egongo da 09:15etik 10:20ra bitartean. Trafiko mozketak Euskadi etorbidean, Esnabiden, Arraunlarin eta Torreatzen izango dira.
Aldaketen eraginpeko eremuetako bizilagunei gomendatzen zaie, ibilgailuak erabili behar badituzte, eremu horietatik kanpo eta gaitutako aparkalekuetan uztea. Era berean, bisitariei garraio publikoan bertaratzeko deia luzatu die udalak, mugikortasun arazoak ez areagotzeko.
