"Bultza dezagun Euskal Selekzioa"
Herriko kirol eragileek eta Gure Eskuk deituta, euskal selekzioen ofizialtasuna eskatzeko elkarretaratzea egin zuten atzo Lezon.
Atzoko elkarretaratzearen irudia da honakoa. Lezotarraren eta Tiñelu elkartearen ondoan den saskibaloi kantxa Euskal Selekzioaren ofizialtasuna aldarrikatzeko eremu izan zen atzo. Gure Eskuk landutako deialdiarekin dozenaka lezoarrak egin zuten bat; deitzaileen artean herriko kirol talde eta klub gehienak ziren. “Bultza dezagun Euskal Selekzioa eta erakuts dezagun munduko nazio bat dagoela hemen: Euskal Herria”, esan zuten.
Futboleko Munduko Koparen testuinguruan deitutako mobilizazioa izan zen atzokoa. Euskal Herriko zazpi lurraldeetako herritarrak ordezkatuko dituen selekzioa, Euskal Selekzioa dela adierazi zuten elkarretaratze osteko irakurketan, “eta horregatik diogu Euskal Selekzio horrek bere lekua izan behar duela edozein kirol eta edozein nazioarteko txapelketa ofizialetan”. Euskal Herria nazioa dela nabarmendu zuten, “historia munduko beste herri batzuekin partekatu duena eta gaur egungo zibilizazio erronkei heldu nahi diena. Munduan dagokigun lekua izan nahi dugu, ez gehiago, ez gutxiago, arlo guztietan”.
Lezotik herriko eta nazioko alor guztietako eragileak eta erakundeak interpelatu zituzten atzokoan, esateko lan egin behar dutela Euskal Selekzioak ofizial izan daitezen, eta horretarako urrats praktiko eta eraginkorrak egin behar direla uste dute, “jendartearen nahi hori errealitate bihurtzeko”.
