"Futbolaren aitzakiapean espainiar nazionalismoa indartzen ari da"
Atzoko gizonen futboleko Munduko Koparen finalaren harira, elkarretaratzea egin zen Gamon Zumardian arratsaldean Euskal Herriko selekzioen ofizialtasuna aldarrikatzeko.
Atzoko elkarretaratzearen une bat. Atzoko gizonen futboleko Munduko Koparen finalaren harira, elkarretaratzea egin zen Gamon Zumardian, arratsaldean, Euskal Herriko selekzioen ofizialtasuna aldarrikatzeko eta aldi berean “futbolaren aitzakiapean espainiar nazionalismoa indartzen” ari dela salatzeko. Dozenaka izan ziren herri ekimenez deitutako mobilizaziora batu zirenak; ondoren, Donostian egin zen manifestaziora joan ziren.
Elkarretaratzea bukatzeko egin zen irakurketan, deitzaileek nabarmendu zuten atzoko finalak, “beste behin ere”, agerian utzi duela “gure herria bizitzen ari den asimilazio prozesua eta espainiar estatu-proiektuaren normalizazioa”. Munduko Kopan Euskal Selekzioaren ofizialtasuna ukatua izan dela adierazi zuten, “gure nazioak eta gure selekzioak ukatuak izaten jarraitzen dute. Urteetan egin bezala, oraingoan ere mundialean Euskal Selekzioaren ofizialtasuna ukatu dute. Bai eta, espainiar zein frantziar selekzioak inposatu ere”.
Munduko Koparen harira gertatutakoak ez direla futbolera mugatzen diren gaiak azaldu zuten mobilizazioan. “Espainiako selekzioa normalizatu eta sustatzen den bitartean, euskaldunon borondate nazionala zapalduta dago, euskal herritarroi gure herria eta gure koloreak nazioartean ordezkatzeko aukera ukatzen zaigu”. Horrela, Euskal Selekzioen alde egitea ez dela soilik kirol arloko aldarrikapena nabarmendu zuten: “Herri honen aitortzaren alde egitea da, gure nortasunaren alde egitea eta Euskal Herriak bere etorkizuna libreki erabakitzeko duen eskubidea aldarrikatzea”.
Zeregin horretan borrokaren eta antolakuntzaren bidetik jarraitu behar dela esan zuten, “har ditzagun kaleak eta zabal dezagun gure herriaren eta gure selekzioaren aldeko aldarria lau haizetara, defenda ditzagun gure koloreak”.
