Oiartzun Irratiaren denboraldia agurtzeko, zuzeneko saioa
'Artealdean' saioa zuzenean egin zuten Hipatia lorategian gonbidatuekin eta musika kontzertuarekin. Alain Mendizabalek aurtengoaren balorazioa egin du.
Bi aste baino gutxiago geratzen dira uztaila bukatzeko, baita, ondorioz, Oiartzun Irratiak aurtengo denboraldiari amaiera emateko ere, eta zerbait berezia egite aldera, Artealdean saioa zuzenean egin zuten aurreko astean Hipatia lorategian.
Maddi Galdosek gidatzen du saioa, eta hitzordu berezi horretara Bengo eta Karmele Mitxelena gonbidatzeaz gain, Itxaronen kontzertu akustikoa ere izan zuten.
Artista oiartzuarrak erdigunean
Alain Mendizabal Oiartzun Irratiko langileak kontatu du irailean abiatu zutela Artealdean saioa, eta “oso ondo” joan dela: “Galderak artearen inguruan izatean ez bazaude gaian erabat sartuta saioa mardula izan daiteke, baina uste dut guk arin egin genuela. Izaro Retegik hasiera batez saioaren amaieran egin behar zuen kontzertua, baina azkenean saioaren hasieran eta tartean ere abestu zituen kantuak, eta horrek ere eman zion beste ukitu bat hitzorduari”, kontatu du.
Orotara hamar saio egin dituzte, eta gonbidatu mordoxka bat pasa da bertatik; hala nola, Malen Etxebeste, Xabi Belauntzaran, Izar Aizpuru edota Karen Muñoz. Mendizabalek, gainera, nabarmendu du gizon eta emakumeak tartekatu dituztela, eta kontuan izan dutela diziplina ezberdinak jorratzen dituzten herritarrak. Era berean, dio ikusita Artealdean saioak zer nolako harrera izan duen eta jendeak zenbat entzun duen, hurrengo urtean ere jarraitzeko asmoa dutela.
Ahots berriak
Denboraldi osoari erreparatuta, berriz, Mendizabalek kontatu du irratsaio berriak ondu dituztela, eta horren adibidetzat jarri du Herrimatuz. “Belaunaldiartekotasuna euskaraz” lantzeko asmoz sortu dute aipatutakoa, eta helburua da Oiartzungo gazteak Zaintzadi, Aiton-Etxen eta Petra Lekuona proiektuetako parte diren erabiltzaileekin harremanetan jartzea. “Helduek Haurtzaroko eta Elizaldeko gazteen galderak erantzuten dituzte, eta oso polita izaten ari da”.
Horretaz gain, dio Manex Elgetak eta Iraide Susperregik martxan jarri duten Oiartzuarra naz ta harro noz podkasta ere ematen ari direla irratian, eta horrek “freskura” ematen diel parrilako edukiei.
Manitzen ere 2025-2026 denboraldiko saio berri bat da, Laborerekin eta Arraztalorekin egiten dutena; “etortzen diren gonbidatuak nahiko ezagunak dira, eta elikadura, zaintza, nekazaritza eta bestelako gaien inguruan aritzen dira hilabetean dira”.
Abuztuaren 31n, bueltan
Berrikuntzak alde batera utzita, baina, aurkezleak ez ditu aipatu gabe utzi nahi izan orain arteko bidean jarraitu duten saioak. “Gainerakoan, ohiko saioak izan ditugu. Esaterako, Zana zalakon jendearen bizitzetan murgiltzen jarraitu dugu, eta Abaraxkako tartea ere izan dugu gurean”, gehitu du.
Oiartzun Irratiak aurtengo denboraldia hilaren 30ean bukatuko du, eta abuztuaren 31ko 10:30ean itzuliko dira berriz mikrofonoetara.
Laburbilduz, beraz: “Denborali gazi gozoa izan da. Irratsaio berri batzuk egin ditugu eta oso harrera polita izan dute. Gainera, belaunaldi desberdin pila bat ari gara sartzen irratian, eta uste dut hori herria egiteko beste modu bat dela”.
