"Gora herria, gora madalenak"
Hasi dira madalenak. Aurretik bost egun, 101 ordu eta 140tik gora ekitaldi dituzte errenteriarrek gozatzeko.
Hasi dira madalenak Txupinak eztanda egin eta hasi dira festak. Aurretik bost egun, 101 ordu eta 140tik gora ekitaldi dituzte errenteriarrek gozatzeko. Herriko Plazak dar-dar egin du herri bat dantzan jarri duenean Musika Bandak Zentenarioaren doinuekin. Ez dio usadioari huts egin Luis Mari Moreno Pirata aurtengo omenduak eta txupinazorako minutu parea falta zenean bota du bertsoa: Nola herriak eraiki diren, harri multzo bat hazita, gure harriak herri bat dira, bizilagunak bizita. Madalenetan, festak, gozatu mutil-neskak, txupinazotik hasita! Errenterian bizi naiz eta, egin zaidazu bisita. Txaloka erantzun dio plazak.
Txupinak eztanda egitearekin batera hasi da Musika Banda Zentenarioa jotzen eta plaza dantzan eta kantuan, txunpa, txunpa, txunpa… une horretatik aurrera murgildu da herria eta herritarrak festan.
Txupinazoan ez dira falta izan aldarriak ere. Euskal Herria irabaztera. Faxismoari ez leloa zuen pankarta handia zabaldu du Ernai Gazte antolakundeak, plazaren aurrean, eta handik metro gutxira IAS Gazte Antolakunde Sozialistak faxismoa borrokatzera deitzen zuen pankarta handia ere. Ez dira aldarri horiek bakarrak izan; plazaren atzeko aldean hasieratik ELAren pankarta bat Jesusen Bihotza erresidentzian greba mugagabean direla gogorarazteko; bederatzi hilabete bete dituzte borrokan dagoeneko. Erresidentzia horretako egoiliarrek eta euren senideek ere eraman dute beren adinekoen egoera gaur kalera; txupinazoaren unea pasa arte itxaron dute azken horiek, eta erresidentzia kanpoan egin dute protesta euren senideek bizi duten egoera salatzeko. EMKE Musika Bandak babestu egin ditu eta argazkia eurekin egin du.
Aurten ere ez da posible izan. 18:00ak inguruan hasi da gutxika betetzen plaza eta irina, arrautza, tomate, ketchup eta halakoak ez sartzeko dispositiboa jarrita bazegoen ere sarbide guztietan, txupinazo garbia urrun dela argi gelditu da aurten berriro, txupina piztu baino ordu erdi lehenago osagai horiek guztiak airean usain eta suma zitezkeen. Saiakera bizia egiten du jai batzordeak, baita udalak ere txupinazoa garbia izan dadin; hurrengo urtera arte itxaron beharko. Akaso orduan…
Festa, festa eta festa aurretik, adin eta gustu denak asetzeko moduko ekitaldi zerrenda amaigabea. Gozatzeko deia beraz herritar denei, baita herri kanpotik etorriko direnei ere. Berriro mezu argia jai batzordeak eta Errenteriako Udalak, Aizpea Otaegiren hitzetan jai egitaraua aurkezteko unean: “Erakutsi diezaiogun elkarri maitasuna eta errespetua, babes dezagun elkar eta konprometitu gaitezen guztiontzat askeak eta berdinzaleak izango diren festekin. Izan dadila herria eredugarri”.
Madalenetako egitarau osoa Herri Bizian ikus daiteke egunez egun (klik hemen)
