Abiadura bizian ibili dira haurrak
Gaur goizean, hilak 24, Haur Krosa antolatu dute hamaseigarrenez Koldo Mitxelena plazan, bertan ehun haur inguru izan dira.
Madalenak amaitzear dira, bi egun besterik ez dira falta aurtengoak amaitzeko. Oraindik ere, etxeko txikienek indarra dute eta zapatilak prest izan dituzte goizean goizetik. Eguzkiak gogor jo du goizean plazan, baina hori ez da aitzakia izan haurrak korrikan aritzeko. Guztira, 80 lagun inguru izan dira hainbat mailatan: benjaminak, kimuak eta infantilak.
12:00etan, denok elkarrekin, Batzokiko Kirol Taldearen eskutik beroketak egin dituzte. Irteten lehenak 7 urte bitarteko haurrak izan dira, eta plazari buelta bat eman behar izan diote. Kimuek, berriz, Biteri kalera atera eta Maria de Lezo kaletik plazara sartu dira. Infantilek, berriz, ibilbide luzeena egin behar izan dute Biteri, Foru plaza eta Madalena kalea zeharkatuta. Guztira bi buelta eman dituzte.
Lasterketak amaituta, lasterkari guztiek euren domina eta diploma jaso dituzte. Xahututako indarrak errekuperatzeko tartea izan dute, eta plazako tabernek kroketak, ogitartekoak eta freskagarriak eskaini dizkiete haurrei. Gurasoen argazkiak ere ez dira falta izan, eta podiumean gora eta behera aritu dira haurrak argazki onena ateratzeko zain.
Urtero omendu bat du Haur Krosak, eta aurtengoa Xakib Laxgar izan da. Bere seme-alabekin batera aritu da, harat honat. Goiza borobiltzeko lore sorta eman diote, eta esker oneko hitzak izan ditu Behobia-Donostia hirutan irabazlea izandakoak. “Mila esker gaurkora gonbidatzeagatik. Haur eta gazte guztiak animatu nahi ditut kirola egitea, eta batek daki Behobia-Donostiako irabazlea zuetako baten bat izango den”.
HITZA bertan izan da. Jarraian, lasterketan ateratako argazki-sorta:
