Erraldoiak izan dira goizeko protagonistak
Eguraldia dela eta, goizerako zein arratsalderako aurreikusitako desfilea bertan behera utzi dute, eta Lekuona fabrikan egin dituzte dantzaldiak topaketan bildutako hemezortzi konpartsek.
Oreretarrek azken kartutxoak erreko dituzte gaur, hilak 25, madalenetan. Azken eguna dute gaur, baina horrek ez du esan nahi herria nekatuta eta lo dagoenik. Goizean goizetik, txaranga zein dultzaina doinuek herria iratzarri dute eta herritarrak gogoz jaiki dira azken egunaz gozatzeko. Eguraldi iragarpena ez dute lagun izan, eta Erraldoien Topaketa lekuz aldatu behar izan dute. Goizerako zein arratsalderako aurreikusitako desfilea bertan behera utzi behar izan dute. Kalean desfilatu ordez, gaur goizean bildutako hemezortzi konpartsak Lekuona fabrikako areto nagusian bildu dira. Bi ordu inguruko dantzaldia egin dute, eta jendearen berotasunak aretoa hankaz gora jarri du.
Xanti eta Maialenek lagun berriak egin dituzte, eta kuadrilla ederra osatuta Santiago eguneko goiza giro ezin hobean pasa dute. Pasaia, Lezo, Hernani, Lazkao, Gros, Galtzaraborda, Ikasbide, Gasteiz, Oiartzun, Ondarroa, Lekeitio, Herrera, Ororbia, Kanbo, Bera eta Molins de Reitik etorritako konpartsak izan dira gaurkoan parte hartu dutenak. Konpartsa hauez gain, Orereta Ikastolak goizean buruhandi berriak aurkeztu ditu. Konpartsa bakoitzak aretoaren erdigunera atera, eta bina dantzaldi egin ditu.
Madalenak Pantxoa eta Peioren doinuekin hasi ziren, Azken dantza kantatu zuten kontzertuan bildutako ehunka herritarrek. Arratsaldean, 19:00etan, Xanti eta Maialenek aurtengo festen azken dantza dantzatuko dute Herriko Plazan. Espero dezagun euriak ez zapuztea arratsaldea, oreretarrek merezitako agurra eduki dezaten.
HITZA gaur goizean Lekuona fabrikan izan da, hainbat herritako konpartsak ezagutzen, eta baita argazkiak ateratzen ere. Hona hemen ateratako irudi-sorta.
